Ba slem elekshon MDC, shain kuna ka High Court ia ka sorkar bad KHADC

Shillong, 19 Nailar:
Ka Meghalaya High Court ha kane ka sngi Thohdieng ka la shain kunai ia ka sorkar jylla bad ka KHADC namar ba ka hap ban kynriah sngi ban shim bishar halor kane ka kam kaba la ujor da da u Bah Cherubin Thongni halor ka jingslem ban pynlong ia ka elekshon MDC shiteng samoi sha ki 6 tylli ki konstitwensi ha KHADC.
Ha ka jingpynmih hukum mynta ka sngi, ka High Court ka la ong ba “Wat la ka la ailad ia ka jingkyrpad jong u nong-iasaid ain ban kynriah sngi ban bishar ia kane ka kam, tangba ki dei ban siew ia ka kuna T.5000 kata ia ka sorkar jylla bad ka KHADC”.
Ka jingshim bishar biang ia kane ka kam kan long ha ka 29 tarik Nailar. Ia ka pisa ba shah dain kuna dei ban thep ha ka account ka Meghalaya State Legal Services Authority.
“Lada ki nongiasaid kim pyndep ia ka jingdonkam ha ka jingbishar ban long biang ha ka 29 tarikNailar, yn khot hajir ia ki ophisar ba dei peit ia kane kam ha ka Kashari” la ong ka Kashari.
Ka Kashari ka la ong ruh ba kam long kaba lah ban pdiang ban shu pynkynriah bunsien ia ka kam tang namar ba ki nongiasaid kim lah ban pynbiang ia ki jingbthah na ki tnad ba dei peit jong ka sorkar.
Ka Kashari ka la shim bishar ia kane ka kam hadien ba u Bah Cherubin Thongni u la ujor da ka PIL pyrshah ia ka sorkar jylla kaba la pynslem ban pynlong ia ka elekshon MDC shiteng samoi sha ki 6 tylli ki konstitwensi ka Khasi Hills Autonomous District Council (KHADC) watla ka la iaid palat ia ka 10 bnai mynta naduh ba ki MDC ki la risain noh.