Ba shah thngan ki samla wadkam, leit kynduh CS ki MLA/MDC WKH

Shillong,1Nailur:
Ki saw ngut ki nongmihkhmat na West Khasi Hills ba kynthup ia u bah Brolding Nongsiej, MLA bad MDC ka seng UDP na Mawthadraishan, u bah L.G Nongsiej MDC ka HSPDP na Nongstoin, u bah K.P Pangniang , MLA bad MDC na Ram brai Jyrngam bad u bah Witting Mawsor MLA na Mawshynrut ki la leit ban ia kynduh ia u Chief Secretary ka jylla u bah Barkos Warjri ha kamra treikam jong u ban ia kren halor ka jingeh kaba ki samla wadkam ka West Khasi Hills ki ia kynduh ha kine ki sngi haduh ba ki shim ia ka rai ban shong shah thngan kaba la iaid mynta la san sngi.
Hadien ba la mih na kamra u CS , haba kren sha ki nongthohkhubor u bah Witting Mawsor u la ong ba ka jingiakynduh jong ki ia u CS ka long ban pynsngew sha ka sorkar jylla ia ka jingeh ba ki samla wadkam kiba la pass ia ka DSC eksam 2010 na kylleng ka West Khasi Hills mynta la lai haduh saw snem kim shym la ioh kam. Kawei na ki jingeh kaba kitei ki nongmihkhmat ki la shimkhia ka dei namarba ka sorkar jylla ka la pynbna ba ka por jong kitei ki samla wadkam ba la pass DSC ka la kut bad don na ki kiba la palat ka rta na ka rta kaba la buh ban ioh rungkam.
Ha ka jingiakynduh bad u CS u bah Witting Mawsor u la ong ba na ka liang u CS u la ong ba shisien ba ka sorkar ka la plie jingkhang ia ki samla ka East Khasi Hills ka hap ruh ban leh kumjuh ia ki samla wadkam ka West Khasi Hills, u bah Witting u la iathuh ruh ba u CS u la kular ban pynjlan ia ka por jogn ki kaba la kut noh. Halor ka jingbym lah ka sorkar u la ong ba u CS u khlem ong eiei. Utei u nongmihkhmat na WKH u la iathuh ba ka daw kaba kongsan kaba la pynlong ia ki samla wadkam ban ia kynduh jingeh ka dei namar ka jingbuhrieh ki ophisar jong ki tnad bapher bapher ia ki kam kiba lait hapoh ka tnad treikam jong ki.
Kitei ki saw ngut ki nongmihkhmat ki la ong ba hadien ka jingiakynduh bad u CS kin sa leit ban kren pynsngewthuh sha ki 47 ngut ki samla wadkam kiba dang bteng ia ka jingshah thngan jong ki haduh mynta ka sngi, ha kaba la don ruh napdeng jong ki kiba la poi sha ki Hospital. Katei ka jingshah thngan ki samla wadkam ka la poi sha ka sngi kaba san.