Ba shah shoh u draibar Tourist, ym shah rung kali Assam sha Shillong

Shillong: Mynta ka sngi ki nongniah kali Tourist kim shah ban wan rung ia ki kali Assam sha Shillong bad ki kali na Shillong sha Assam ha ka ba ki nongleit nongwan ki hap hiar noh tang ha Khanapara Ribhoi District kane ka long hadien ka jing shah shoh jong uwei u nongniah kali Tourist u ba dei na Shillong ha ka 22 tarik u rymphang 2020 ha u International Airport, Borjhar, Assam ha ka ba kala mih ka jingiakynad hapdeng ki nongniah kali tourist ki ba na Assam bad Meghalaya.

Ha ka 22 tarik u Rymphang 2020 u nongniah kali Tourist u ba tip kyrteng kum u Bah Maitshaphrang Marwein, u la shah shoh ha ki dalal ki ba pyniaid kali ia ki nongleit nongwan (passenger) ki ba dei na ka jylla Assam ha Guwahati Air port ha ka por kumba 2:30 baje janmiet.

Na katei ka jingjia kala pynlong ba ki nongniah tourist ka Assam, ki la khang ia ki Tourist taxi na Meghalaya ban rung sha Assam, ha kajuh ka rukom na ka liang jong ki nongniah kali Tourist na Meghalaya, ki la khang ia ki kali na Assam ban rung sha Meghalaya.

Kane ka jingiapynibor kaba mar kylliang ka la sdang naduh ka jan miet sngi nyngkong haduh mynta ka sngi, ha kaba ki nongleit na Meghalaya kila hap ban hiar ha Khanapara bad ki hap ban shim da ka kali Assam ban poi sha Guwahati ha ka juh ka rukom kiba wan na Assam ki hap ban shim da ki kali Meghalaya ban poi sha Shillong.

U bah Egenstar Kurkalang u wei na ki nongialam ba dei peit ia ki nongniah kali ha kane ka jylla Meghalaya, u la ong ba kum ka seng kan ia kynduh la shai ka sngi ban ia kren ia pynbeit ia kane ka jingeh bad ha dien kata kin sa kren ruh ia kiba na Assam halor kane ka jingeh kaba la mih ha pdeng ki nongniah kali.

Halor kane ka jingjia na ka liang jong ka Meghalaya Labour Union kala ai da ka jingujor sha u Director general ki pulit jong ka jylla Assam ba dei ban kem ia kito ki nongleh kam sniew ka jingdawa pisa palat ka dei ka kam lute.

Haba ia dei bad kane u bah Erwin K Syiem Sutnga u la thoh sha u myntri pla pisa ka sorkar Assam u Himanta Biswa Sharma bad kum juh sha u Director General ki pulit ha kaba ia dei bad kane ka jingjia. La pyntip ruh ia kane ka jingjia sha u Commissioner Transport jong ka jylla Meghalaya.