Ba shah shoh ki Khasi, hiar u MDC, ki heh pulit bad magistrate Ri Bhoi sha Umlaper

Nongpoh: Tang mar ia tip halor ka jingshah shoh ki 3 ngut ki samla Khasi ha ki Pulit Assam kiba don ha Umlaper, u Bah Charles Marngar, MDC Mawhati, nangta ki heh Pulit ka Ri Bhoi, kiba kynthup ia u Bah N. Lamare, SP Ri Bhoi, nangta u Raja Brahma, Border Magistrate Ri Bhoi, u BJ Joshi, DSP Ri Bhoi lem bad kiwei, ki la hiar kyrkieh kyrkieh sha katei ka shnong, na ka bynta ban tem ia ki kam huri hura bad kaba lah ban poi sha ki jingjia ba sngewsih ne ka ban ktah ia ka shongsuk shongsain.

Haba u MDC bad ki heh Pulit bad Magistrate Ri Bhoi, ki la poi ha katei ka shnong, ki la pyrshang ban kren sngewthuh jingmut bad ban pynneh ia ka shongsuk shongsain hapoh katei ka shnong bad ha kaba kut, la poi sha ka jingiasngewthuh jingmut.

Ka jingiakren kaba mih ha katei ka sngi, ka long ba ki paidbah ki kwah ba ki Pulit kiba don ha katei ka shnong, ki dei ban mih noh shisyndon bad nalorkata ban weng noh ia ki khyrdop kaba la buh da ki Pulit Assam ha katei ka shnong, namar ba ka la ktah eh ia ka shongsuk shongsain ki paidbah ha katei ka thain.

Katei ka jingdawa, ka la urlong noh ha katei hi ka sngi, namar ki Pulit Assam kiba la wan shong shipor ha katei ka shnong, ki la song ia ki jain ki nep ban mih noh na katei ka jaka, kata ka la long hadien ka jingtuklar naduh u MDC, ki Pulit bad Magistrate, kiba la ioh ban iakren bad ki heh Pulit na ka jylla Assam.
Nalorkata, ka la don ruh ka jingiakren ba dei ban siew bai dawai ia kitei ki samla Khasi, kiba la shah shoh bad kata ruh ka la urlong, namar ki Pulit Assam, ki la kular ban siew ia ka bai sumar, kata hadien ba la poi sha ka jingiakren ban iasuk noh hapdeng u Nongshoh bad nongshah shoh.
Hynne ka step, ki la don ki riew paidbah na katei ka shnong, kiba la pyntip sha u Nongthoh khubor, ba arngut na ki Lai kiba la shah shoh ha ki Pulit Assam, ki la mynsaw jur bad kiba la hap ban rah sha Bhoirymbong CHC, hynrei ka khubor kaba thikna, ka long ba kitei ki samla, kim pat da mynsaw jur eh haduh katta katta, hynrei ki la shu pangmet pang phat ha ka jingshah shoh ha ki Pulit Assam.