Ba shah ram T.5klur ha ki tnat sorkar, ujor ka MEPA sha U MR

Shillong, 2 Jylliew:
Ki nongialam jong ka Meghalaya Editors & Publishers Association (MEPA), ki la ia kynduh mynta ka sngi, ia U Mukul Sangma, myntri rangbah ka Jylla bad ha katei ka jing ia kynduh, ki nongialam ka MEPA, ki dawa na ka sorkar Jylla, ba kan kham pynheh ia ka jingsiew ia ki nongthoh khubor, kiba don ha ka jingpang jingshitom bad ha kajuh ka por, ba kin nym pynlong ruh ia katei ka jingsiew kaba tang shisien. Ka MEPA, ka dawa ruh ia u myntri rangbah, ba un siew bai tymmen, ia ki nongthoh khubor, kiba la trei slem ia ka kam, kiba la don kumba 25snem shaneng ia katei ka kam jongki bad ban ai ruh ia ki jingiarap, ha kaba shna iing ba kin shong kin sah tymmen.
Ka MEPA, ka ai jingmut ruh ia ka sorkar, ba kan ai jinghikai kaba kyrpang ia ki nongthoh khubor, ba kin sngewthuh ia ka rukom thoh khubor, ha ki lain bapher bapher. Ka MEPA, ka dawa ruh na ka sorkar Jylla, ban pynlong ia ka jingleit jurip ia ki skhim bapher jong ka sorkar, lyngba ki prokram ban pynbeit da ka sorkar, sha ki jaka trei kam bapher ha kylleng ka Jylla.
La pynsngew shuh da ka MEPA, ba ki don ki pisa, kiba shah ram ha ki tnat sorkar bapher, ha kaba ka la kot mynta sha ka T.5klur. Ka MEPA, ka dawa ruh na ka sorkar ba kan pyntreikam da ka jingsam ia baroh ki jingpynbna sorkar, lyngba ka tnat pynphriang khubor ka sorkar Jylla bad la dawa ruh ban pynkiew dor noh ia ka bai jingpynbna, ia ki jingpynbna kiba la pynmih da ka Sorkar na ka por sha ka por.