Ba shah rahbor ka longkmie, khang tala ka HYC ïa ka Ferro Alloy

Shillong:Ka Hynñiewtrep Youths Council (HYC) West khasi Hills ryngkat ka Dorbar Shnong Riwiang, mynta ka sngi Thohdieng, kila hiar khang tala ïa ka Ophis jong ka kar khana Ferro Aloy kaba don ha Riwiang namar ka jingsuba shah rah bor kawei ka longkmie ha u nongtrei kane ka karkhana uba dei u bar jylla.
Ka HYC bad ka Dorbar Shnong, ki la shim ïa kane ka sienjam halor ka jingjah jong kawei ka Longkmie ïa kaba la suba jur ba ka shah rahbor ha uwei u nongtrei ka karkhana.

Ka Dorbar Shnong ka ïathuh ba ha ka 20 tarik Nailur, ka Shnong kala leit ban khang tala ïa kane ka karkhana katba ki bor pynïaid kim pat lah ban wan ïalam noh ïa kane ka Longkmie bad ïa une u briew ba suba rahbor, hynrei la kynnoh ba ka karkhana ka la kyndang noh ïa kane ka tala ha ka sngi kaba bud.
Namar ka jingshem ïa kane, ka Dorbar Shnong kala kyrpad ïa ka HYC-West Khasi Hills ban wan tuklar bad ban ïarap lem ïa ka Dorbar Shnong ha ka ban khang tala ïa kane ka karkhana.

U President ka HYC Samla Lumlang Kharsyiemlieh, ula ong ba ka Shnong ka la kyrpad ïa ka Seng ban ïarap bad ka Seng ka ai ka jingkyrshan ba pura ïa ka Dorbar Shnong haba maham ba kane ka kompeni ka dei ban wan ïalam shuwa ïa katei ka Longkmie ba jah lem kumta kan ym ïohlad satia ban plie biang ïa ka karkhana.

Ka HYC ka la maham jur ruh ïa ki bor pynïaid ka kompeni ba kim dei ban plie ne kyndang ïa ka tala, katba kim pat lah ban pynurlong ïa ki kyndon ba la buh.