Ba shah pynpra ka kpep U Sahep Harry Inglis ha Saitsohpen

Shillong, 5 Iaiong:
Kiba bun ki riew rangbah na ka shnong Sohra ki diaw mynsiem bad pangnud haba ki lap ba ka kpep u Sahep Harry Inglis (u sahep na ri Bilat) ka la shah pynpra noh dang ha kine ki khyndiat sngi. Kham mynshuwa u Rupang u la ioh jingtip ia ka jingdon katei ka kpep ha Saitsohpen, Sohra na ki katto katne ngut ki riew rangbah bad ha ka sngi saitjaiñ la leit ban peit ia katei ka kpep sahnam hynrei ka la pynkyndit ia kiba ha katei ka jingialam sngew sarong jong ki ban pyni ia ka kpep u sahep Harry Inglis la lap pynban ba la pynpra ia ka ha kaba ki dak ki shin kumba paw ka pyni ba ka jingpynpra ka long dang shen naba ki khyndew ki dang saw. La lap ba ia katei ka kpep la khlong noh ia ki bynta ba shapdeng jong ka bad hadien ba la khlong la kyrshan pat da ki dieng ba kan ym twa. Katei ka kpep jong u Sahep Harry ka don hapoh jong ka jaka kaba la shimti da ka NIIT mynta.
Katkum ka jingioh lum khana shaphang katei ka kpep la ong ba u Sahep Harry u dei u Officer Incharge ka sorkar bilat ha Sohra, u dei ruh u ba la kemia u Tirot Sing, la thung ruh ia u kum u Assistant Political Agent bad hadien kiba bun ki kam kiba u la bat ha Sohra la ong ba dei ha u snem 1853 ba u la mih noh na ri Bilat ban leit phai sha la ri sha Bilat, bad u la khlad noh ha ka 31 tarik u naitung 1860 ha ri Bilat hi.
Katkum ka jingiathu hkhana pateng shaphang utei u sahep la ong ba shuwa ba un iap u la batai lypa ha laki khun ki kti ba lada un iap dei ban leit rah biang ia ka metiap jong u ha Sohra bad dei ban tep hajan ka dulan jong u ne ka Bungalow kaba don ha Saitsohpen. La ong ba u batai ruh ha la ki khun ba ym bit ban tep ia u hapoh khyndew ne hapoh thliew kaba shu tih,hynrei dei ban buh halor ka mei ramew da kaba shu tei kynton.
La iathuh khana ba hadien ka jingdkut mynsiem jong u la kyllan da ki jingpyniwbih ia ka met jong u, bad dei hadien shiphew snem la ong ba u khun jong u – u Lionel Inglis u la pynpoi ia ka shynrong metiap u kpa jong u ha Saitsohpen bad khlem da tih thliew ban tep la shna ia ka kpep jingtep kaba heh bha kaba heh 14 la 10 mitar. Haduh mynta mynne katei ka kpep ka dang don ha katei ka jaka kaba don ka NIIT mynta. Hynrei ka la pynkyndit ia ki nong Sohra ban lap mynta ba la don ba khlong ia katei ka kpep u sahep Harry Inglis kaba ki la don ruh kiba suba ba katei ka jingkhlong ka lah lehse ban dei ba hapoh katei ka kpep lehse ki lah ban don ki ksiar ki rupa ne kiwei pat ki jingdon jingem ba la thep lang shapoh.