Ba shah khniot ki nongrep ha ki kharkaia, mih ka kompeni shna synsar ha Khliehumstem

Khliehumstem:Man ka por ka la ju mih ka jingkhnium ka jingkren ba ki mar rep kum u synsar ula shah ot kilo palat, nalor ka jingpynhap kyrdan uba sniew ne uba kham bha (grading) bad, haba ki nongrep ki ujor sha kano kano ka bor ba dei peit, kam ju urlong kam satia bad ka kut ha ka jingong, kat nang rep kat nang syrdep.

Hapdeng kane ka jingduh jingkyrmen ki nongrep, ka don ka jingkyrmen ba ki nongrep synsar kin lait na kane ka jingshah khnoit bad kane ka dei ka sienjam kaba la shim ka Basuba Brooms Producer Company Limited, kaba dei ka kompeni jong ki nongrep synsar. Kane ka kompeni kaba la ieng kumba ar snem tam mynta, ka la don ha them bhoi, ha shnong Khliehumstem, Ri-Bhoi District bad ka jngai tang kumba 47 km eiei na nongbah Shillong.
La seng ia kane ka kompeni ban iarap ia ki nongrep synsar na kaba shah khniot ha ka dor ka mur, ka jingshah ot kilo, bad kumjuh ban pyllait na ka jingshah pynhap kyrdan ha ki malik nongthied ia u synsar kum u shi nombor, ar nombor bad ban pyniapher ruh ia ka dor jongki. Kaba kham kongsan shuh ka long ban pyniaid iew ha ka dor kaba kham bit kham biang.

Ha ka jinghiar ki nongthoh khubor sha katei ka shnong, la ioh ban iakren bad ki nongpyniaid kane ka kompeni, kiba la iathuh kumno kane ka kompeni ka la iarap ia ki nongrep na ka jingshah khnoit.
U bah Pynshai Masharing uba dei kum u Office Assistant kane ka kompeni, u la iathuh ba la seng ia kane ka kompeni lyngba ka jingkyrshan ka National Bank for Agriculture and Rural Development (NABARD) bad ka NAB Foundation. Haba batai ia ka jingthmu ban seng ia kane ka kompeni, u bah Pynshai u la iathuh ba ka thong ka long ban pyllait ia u nongrep synsar na ka jingshah khyrwait dor ha ki kharkaia, ka jingshah khein ia u synsar uba shi numbor ne ar nomber bad ban pynioh ia ka iew kaba bit dor.
Ha kane ka kompeni ki don 10 ngut ki Director kiban iapyrkhat kam ban pyntyllun ia ka kam na ka por sha ka por.

Ha ka jingiaid lynti kaba ar snem, ka la don ka jingiarap ia ki nongrep watla ki dang don kiba sngew artatien namar ba kim pat lah ban pynkylla ia ka rukom pyrkhat jongki na ka jingsngew artatien namar ba ka long thymmai ha ka jingmut jingpyrkhat jongki ia ka kyrteng kompeni. Kawei pat kaba ka kompeni ka dang suki ban trei ia ki kam kiba kham heh, ka dei namar ba kam pat lah ban thied ia ki synsar shibun namar ba kam pat don ka spah kaba heh.
Ha kane ka kompeni, ki nongrep ki hap ban rung dkhot lang ha kane ka kompeni, ha kaba kin leit rah ia u mar sha ka kudam bad ki sa thain ia u synsar ban leit pyniaid iew.

U bah Pynshai ula iathuh ba la don ki briew kumba 11 ngut kiba la wan iakren ban thied ia u synsar bad ban pyniaid iew shabar jylla kum ha Mumbai, West Bengal, Delhi bad kiwei ki jaka.
Katkum ka jingiathuh, ka jingpynmih synsar na katei ka thain Khliehumstem, kam duna ia ka 500 ton ha ka shi snem.
U bah Pynshai ula iathuh ba ia u synsar la thain bad thep ha u paip plastic shwa ban leit die sha iew. U la ong ba da kaba leh kumne, kam don shuh ka jingshah khnoit ia ka dor, ka jingshah khein nombor ia u synsar. Ha ka jingshisha kila thain da u thri hynrei ka dor ka la kham rem na ka jingshim por ban shna ban thain bad ka jingkham jynjar ban ioh ia ki tiar ki tar.

Haba kyntu ia ki nongrep ban iatyllilang, u bah Pynshai ula iawer ia ki nongrep ban iai shah ban iatylli na bynta ka jingbit jingbiang jong ka kam ka jam bad ka kamai kajih jongki. Bad ha kajuh ka por, ula kyntu ia ki nongthied kiba don jingthmu ban pyniaid iew ba ki lah ban iakynduh ia ki nongpyniaid jong kane ka kompeni.