Ba shah khate bainong, mih surok ki nongbylla ICAR, CAU bad NBPGR

Shillong, 08 Jylliew:
Ki nongtrei bylla na ka Indian Council for Agricultural Research (ICAR), Central Agriculture University (CAU) bad ka National Bureau of Plant Genetic Resources (NBPGR) ki la mih sha surok hynne ka sngi ban pyrshah jur ia ka jingshah khate ka bainong bylla haduh 40 percent ha ka sorkar pdeng. Kumba 500 ngut ki nongtrei bylla kynthup ki shynrang, ki kynthei bad Khasi bad bym dei Khasi, na kine ki lai tylli ki tnad kiba don ha Umiam, Ri-Bhoi district ki la pynlong ia ka jingiaid kjat na khmat ka Central Agriculture University shaduh khmat khyrdop ka ICAR ha Umiam ryngkat ki lama, ki jingthoh ban pynrem jur ia ka sorkar u Narendra Modi.
Ia kine ki nongbylla la kyrshan ruh da ka Confederation of Ri-Bhoi People (CoRP) hapoh ka jingialam u President u Bah Bandari Ryntathiang.
Kine ki nongtrei bylla ki don kiba la trei haduh 20-30 snem hynrei ki la shah khate bainong bad don ruh kumba 9 ngut na ICAR kiba shah beh kam ha kiba heh.
U Bah Marius L Nonglait uba trei bylla ha ka NBPGR la 20 snem eiei u la ong ba ha kane ka tnad, ki don kumba 22 ngut ki nongtrei bylla bad ki la iakynduh jingeh mynta u snem namar ka jingkhate bainong ka sorkar pdeng haduh 40 percent. U la ong ba ia ki nongbylla la siew ha ka dor T. 7000 ha ka shi bnai hynrei da ka jingshah khate 40 percent, ka jingioh jongki ka la hiar sha ka T. 4000. U la ong ba ki nongtrei bylla ki la wad jingtip na kiba heh halor kane bad ka jubab kaba ki ioh ka long ba ka dei namar ba ka sorkar pdeng ka la pynduna ia ka mang tyngka.
“Ki khate tang ia ki nongbylla sngi bad ka mut ba u Modi u la isih ia ki nongbylla sngi”, la ong u Bah Marius bad bynrap, “Ngi kwah ban kyntu ia u Modi ba un pynsangeh ia kane lada u isynei ia ki nongbylla kumba u la ju kren”. U Bah Marius u la ong ba kin leit tied jingkhang wat shaduh Delhi halor kane bad lada kim sngap ngin khang ruh ia ka ophis.
Iwei pat i Kong I la ong ba I la shah beh kam ha kiba heh hadien ba I la trei snem khlem tip ia ka daw nalor ba kim pynlait ruh wat ia ka EPF ruh haba ki aplai.
Ki la iathuh ba ki la dep pyntip sha MP u Bah Vincent H Pala halor kane.U President ka CoRP u bah Bandari u la ong ba ka seng kan iakren bad ki bor ba dei peit ha kaba ia u kontarktor ba ioh ban leh ia kane ka kam kontrak bym dei ban khate ia ka bainong hynrei dei ban siew beit kumba ju siew.
U la ong ba ka seng ka la hap ban kyrshan ia kane ka jingiakhih jong ki nongbylla hadien ba ka la lap bad iohi ia ka jingshah ban bein jongki khamtam ban shah khate haduh 40 percent na ka bainong ka long kaba jubor haduh katta katta. Ngin sa phah jingthoh sha ka NBPGR sha Delhi ba kin sangeh ia kane ka jingkhate bainong ia ki nongbylla”, la ong u Bah Bandari.