Shillong: Ki pulit ka East Khasi Hills District ha ka 23 tarik u Lber 2020, ki la ioh ban kem ia 2 ngut ki dkhot ka Khasi Student Union halor ka jingsuba ia ka jingdonkti jong ki ha ka jing dung da ki tiar pynmynsaw ia ki 7 ngut ki briew ha iewduh ha ka 29 tarik u Rymphang 2020.
Kine ki 2 ngut ki dkhot ka KSU kiba la shah kem ki long u Melajied Khongbuh u Publicity Secretary KSU Jaiaw Circle bad u Laldin Nongkynrih, u dkhot ka KSU Mawkhar Circle.
Kat kum ka kyrwoh na ka Superintendent of Police East Khasi Hills, la iathuh hadien ka jingia kynad ka ba la mih na ka jing shah thombor jong ki dkhot ka KSU ha Ichamati ha ka ba u bah Lurshai Hynniewta u la khlad noh, ka la don ka jingshah dung ha iewduh bad u wei u briew u ba tip kyrteng kum u Rupchand Dewan u la khlad noh bad 6 ngut kiwei pat ki la mynsaw.
Na ka liang ki pulit ka East Khasi Hills, kim shym la shongthait bad wad ia ki ba don kti ha kane ka jingthombor bad ha kine ki 3 taiew ka la lah ban lum ia ki sabud ban ithuh ia ki briew ki ba donkti ha ka ne kam.
Ha ka 23 tarik u Lber 2020 ki pulit ka East Khasi Hills, ki la ioh ban kem ia u wei u briew u bala suba ba u donkti ha ka ne ka jingdung da ki tiar pynmynsaw ia ki briew ha iew duh.
Kat kum ka kyrwoh ki pulit la iathuh ba u ne u ba shah kem u la leh ia kane ka kam ha ryngkat bad 3 ngut ki paralok jong u bad ha ka jingialam jong u la ioh ruh ban kem sa ia u wei u ba suba ban donkti lang ha ka ne ka kam.
Na ka liang ki pulit ka East Khasi Hills, ki dang thwet sa ia ki ar ngut ki briew ki ba donkti lang ha kane ka kam thombor ha iewduh.
Phi don ban ong eiei?