Ba shah brut man ka sngi, hap khang dukan, bym don jaka ieng kali ha Umdiengpoh

Umdiengpoh:Ka jingplie ia ka iew rud surok ne ka laybye market ha shnong Umdiengpoh, ha surokbah Shillong-Sohra, kam shym la wanrah jingmyntoi than ia ki nongshong dukan namar ba ym don nongthied nongpet.

Ha kane ka iew la don 22 tylli eiei ki dukan ha kaba la plie paidbah da u MLA ka Sohra u bah Gavin M Mylliem ha ka 25 tarik Risaw 2022 kaba la mang na ka skhim PMKKKY bad CMSDF ha ka jinglut kaba T.69,56,200.
Hynrei watla ka la iaid sha ka ar snem eiei mynta hynrei ka iew ka pjah slam slam bad la jan baroh ki dukan kila khang lut.

Katkum ka jingiakren bad u Rangbah Shnong ka Umdiengpoh u bah Maurice Dohling, ka daw kaba kongsan kaba la pyllong ia ki dukan ban khang ka dei na ka jingbym don ki nongwan thied wan pet, bad ka daw halor kane ka jingbym don ki nongthied nongpet, ka dei namar ba ka rukom shna ia ka iew kam iahap satia ha kaba kam don satia ka jaka ieng kali bad kane ka la pynngiah ia ki nongleit nongwan ban ieng ban wan thied ia ki mar ki mata ne ban dih bam ja ha katei ka jaka.

U bah Maurice ula ong ba ha ka jingshisha ka shnong ka la kyrpad ia ka tnad PWD, ia ki nongmihkhmat ban shna ia ka jaka ieng kali ha ka jaka kaba ker kynroh hynrei kim shym la urlong satia.
“Ka jingbym biang ka iew ka dei namar bym don jaka ieng kali. La iakynduh ia ka PWD ruh tangba ki ong ban sa ia peit”, la ong u bah Maurice.
Ha ka jingshisha, ha shnong Umdiengpoh ki don ruh ki jaka jngohkai kiban khring ia ki nongwankai tangba namar ba ka shnong kam pat lah ban pynitynnad ia ki na ka jingbym ioh jingiarap na ka sorkar, ki la shu sop niut. Ki jaka jngohkai kiba don ha kane ka shnong ki long ka Kshaid Khilon, ka Synranglieh kaban iohi shynna sha them, ki krem, bad kiwei.

Ha ka jingiakren bad iwei I longkmie ba shong dukan, I la iathuh ba mynta ki por duna iew bha namar ba duna kiba wan kai bad ka iew ka kham thnem bha ha ka por bnai lyiur ki kham bun kiba wankai.
Ka jingbym don iew, ka dei namar bym biang ka jaka ieng bad kiba ioh dukan kim lah shan ban shong dukan haba ym don nongthied nongpet. I la ong ba lada don ka jaka ieng kali, ka iew ka don.