Ba shah bam ei T.25lak ka bai sying, byrngem ki nongrep ban sei na iing ia u briew ka iTeam

Shillong: Ka kynhun jong ki nongrep Sying jong ka thain Mawchynrut kiba don kumba 30 ngut ei ei hapoh ka jingialam jong ka kong Etilda Rongrin, kaba na ka shnong Umdang ki la shah thok, shah shukor bad shah bam ei kumba 25 lak tyngka ei ei ka pisa ha uwei u briew uba la kam ialade kum uwei na ki heh jong ka seng ki nongrep jong ka jylla Meghalaya.

La ong ba katei ka jingjia ka la jia naduh ki 5 – 6 bnai myn shuwa jong u snem 2021, ha kaba utei u briew uba la wan ban pynbieit ia ki nongrep da kaba u la pynbang ban shim ia u Sying ha ka dor kaba kham heh ban ia kaba kiwei ki shim bad kata ka long 16 tyngka shi kilo, hynrei ia ka buit sianti jong u, ym shym la don ban ioh kem pynban la shu shah thok haduh ba ka la mih pynban ka jingiatharai sniew na ki nongrep ia ka kong Etilda Rongrin, kaba long kum kawei na ki nongpyniaid iew ia u Sying ha utei u briew.

Hadien katei ka jingjia ki katto katne ngut ki nongkitkam na ka seng ki nongrep kaba la tip kum ka Hill Farmer Union kiba kynthup ia u samla Paskal Dkhar shongknor ka Hill Farmer Union jong ka thain Mawchynrut Block bad u bah Zacheus Tympuin president ka Hill Farmer Union West Khasi Hills District bad kiwei kiwei ki la hiar ha katei ka thain ban kylli pyrthew ia katei ka jingjia bad hadien ba la ioh ban iakynduh markhmat bad u samla Joining Rongrin, Manager jong katei ka kong la sngewthuh ba ka dei tang ka jingshah thok pyllein pyllein ha uta u briew u ba la kam ialade kum u heh jong ka seng ki nongrep bad uba la kam ruh ba u dei na sor Shillong.

U Samla Joiningstar Rongrin , u la ong ba naduh nyngkong u la kloi ban lum sying ban iarap ia ki para nongrep haka dor ba biang ban pynim iaki mongrep bad mynta ruh u ong ba u la kloi ban donlang bad ki nongrep ban pynioh ia ka hok Jong ki. U la ong ba ki paidbah kila tip lut ia ka details ( property) jong uta u briew bad lada um sngap, ki la long ba kloi wat ban leit sei na iing ia uta u briew.

Katei ka jingiakynduh lang kaba lyngkot hapdeng ki nongkitkam jong ka seng Hill Farmer Union bad kitei ki nongrep la pynlong ha ka shnong Umdang bad nalor kitei ki nongrep la donlang ruh ki longkmie jong katei ka thain bad u samla Edmund Mawsor, Sordar ka shnong Mawkhap Mawchynrut west khasi hills district.