Shillong, 12 Risaw:
Ki samla pule ka Kiang Nangbah Govt College hapoh ka lama ka Kiang Nangbah Govt College Students Union (KNGCSU) ki la byr ngem ban pynlong ia ka jingiakhih lada ka sorkar kam siew noh ia ka tulop ba sahteng haduh shiphew bnai ia ki nongtrei kane ka kolej.
U Vice-President ka KNGCSU, u Bah Plielad lang Pohti u la ong ba ka seng ka la dep iakynduh dang shen ia ki heh ka tnad Higher & Technical Education ba ka sorkar ka dei ban pynlait noh ia ka tulop ba shiphew bnai jong ki nongtrei namar ba kane ka la ktah ia ka jingdonkam jongki kaba man ka sngi ha ka thied ka pet, ban siew bai skul khun bad kiwei ki jingdonkam.
U Bah Pohti u la ong ba ka jingpynsem ka sorkar ban pynlait ia ka tulop ka la ktah jubor ia ki nongtrei kane ka kolej bad ka dei ban pynlait noh mardor ia ka tulop.
“Ngi buh por 15 sngi ba ka sorkar ka dei ban pynlait noh ia ka tulop jongki bad lada kam lah ngin pynlong syndon da ka jingiakhih”, la ong u Bah Pohti.
U la ong ba kiwei pat ki jingdawa ka seng ka long ban pynsted ban shna noh ia ka jingpynkha ia ka iing jong ka kolej kaba sahteng haduh mynta tang ha ka jingpynkhreh ka PWD (building) ia ka jinglut jingsep, ban pynbha noh ia ka surok ban leit sha kane ka kolej bad ban pyntreikam noh ia ka Girls hostel.
‘Ngi tip ba ki samla ba wan pule ha kane ka kolej ki dei na nongkyndong bad kiba duna ka ioh ka kot bad ka dei ka kamram jong ka sorkar ba kan pynbiang ia kane ka kolej khnang ba kan long iaryngkat bad kiwei pat”, u la ong.U Bah Pohti u la takrain ruh ba ka jingbym ki jingdonkam ha kane ka kolej dei namar ka jingle sting ka sorkar bad ruh ka jingbym ler ki nongialam ba la jied da u paidbah.
“Ngi iawer lang ia ki sengbhalang, ki paidbah ban iasnoh kti lang ha ka jingiakhih jong ngi kaban long naduh ka 22 tarik Risaw lada ka sorkar kam lah ban leh ia kine ki jingdawa”, la bynrap u Bah Pohti.
Phi don ban ong eiei?