Ba sangeh iakhih, kyntait kong Agnes, ba shah thied

Shillong, 2 Nohprah:
Ka Civil Society of Wo men Organisation (CSWO) ka la rai ban kynran dien ban iadon bynta bad ki sengbha lang kiba pynlong ia ka jingiakhih ban dawa ia ka Inner Line Permit (ILP) ha ka jylla.
Haba iakren mynta ka sngi bad ki nongthoh khubor, ka Kong Agnes Kharshiing, President ka CSWO, ka la ong ba ka jingdon ki riew shim kabu na ka jingiakhih jong ki sengbhalang, kum ka jingpynjot ia ki mar mata, ki mynsiem, ka la ktah ia ka CSWO ba kan shim ia kane ka sienjam ban kynran dien noh na ka jingiadon bynta bad kiwei ki sengbhalang.
“Ka la don ka jingkynnoh da ka khubor ka khlieng ka tyngab ba ka CSWO ka weng noh namar ba shah thied, ba leh politik hynrei kane kam dei kaba shisha”, la ong ka Kong Agnes.
Hynrei watla ka la ong ban nym iadon bynta shuh bad ki sengbhalang, hynrei kan iaid da ka lynti ban iakhun ban pyntreikam ia ka ILP. “Ngin iakhun da ki lad ki lynti ba dei da ka lynti jong ka ain”, la ong ka Kong Agnes.
Ym tang ka ILP, na ka liang ka seng kan ieng ban bteng ban iakhun ia ki jingeh jong ki paidbah ha ka liang baroh kynthup ka pule puthi, ka marbam mardih, bad kiwei kiba ktah ia u luk u lak ha ka imlang sahlang.