Ba sah lyngngoh, yn pan jingshai ki nonghikai SSA na Delhi

Shillong, 20 Nohprah:
Ki nonghikai skul hapoh jong ka lama jong ka AMSSASTA ki la rai ban leit pan jingshai na ka tnad Human Resources Development (HRD) ka sorkar pdeng na New Delhi hadien ba ki la shu sah ha ka lyngngoh ia ka jingpyniapher siew tulop ka sorkar jylla hapdeng ki nonghikai ba la pyntbit bad kiba khlem pat pyntbit.
Mynta ka sngi, da ki spah ngut ki nonghikai ki la pynlong ia ka jingshong kyrain ha khmat ka Additional Secretariat ban pynpaw ia ka jingbym hun ia ka jingleh ka sorkar jylla.
U president jong ka AMSSASTA Bah L Mangar u la ong ba kin phah da ka jingthoh sha ka tnad Human Resource’s Development jong ka sorkar pdeng ban pan jingpynshai halor ka tulop jong ki nonghikai SSA.
U la ong ba katkum ka jingtio ka MHRD ka la mang tang kawei ka tulop ia ki nonghikai SSA ha UP School bad LP School, hynrei ka sorkar jylla pat ka pyniapher ia kiba la pyntbit bad bym pat pyntbit.
“Ngi kwah jingtip na ka MHRD bad ngin sa hun ynda la ioh na ka”, u la ong bad bynrap, “Lada ka MHRD ka ong ba ka pyniapher ia ka jingsiew ia ka tulop jong ki nonghikai kiba la pyntbit bad ki bym pat pyntbit, ki kin pdiang hynrei lada ka MHRD ka mang kumjuh ia baroh, ka seng ka ai da ka PIL ha poh iing bishar’.