Ba sah khongreng ka skim sorkar Congress ha Tyrso, jurip ki seng bad shnong, dawa bteng ia ka jingpyntrei

Nongpoh: Ki nongialam ka KSU Tyrso Unit, ki nongialam shnong Raid Tyrso lem bad ki nongialam ka Tyrso Valley Wildlife Protection Society, ki la leit ban jurip ia kawei ka jaka kaba ka sorkar kaba la thmu ban tei ia ka Multi Facility Center hapoh ka shnong Tyrso, kaba dei kawei na ki shnong ha Ri Bhoi bad kaba don ha khappud hapdeng ka Meghalaya bad Assam, kata hadien ba ki la iohi ba katei ka jingtei ka la sahteng bad khlem lah ban pyndep kat haduh kine ki sngi.

Ki nongialam ka KSU, FKJGP lem bad kitei ki riew rangbah na katei ka thain, ki la iathuh ba ia katei ka skim kaba la pynmang ha katei ka shnong, ka la dei ha u snem 2017-2018, ia kaba la dei ban pyndep noh tang hapoh 2 snem naduh katei kaba la pynbna ba yn tei ia katei ka Multi Facility Centre.

Kitei ki nongialam ka KSU bad FKJGP, kiba kynthup ia u samla Balajied Sten bad u samla Fleming Sten, ki la iathuh ruh ba ia katei ka projek la wanrah da ka sorkar Congress, kaba la buh ruh ia ka jingpynmang tyngka kaba T. 1 klur tam, kata na ka bynta ban kyntiew ia ki kam pynroi ha katei ka thain bad khamtam eh haba iadei bad ki kam jngohkai pyrthei, namar ba katei ka thain ka dei kaba la paw namar ki sim Amur Falcon, kiba la wan namla ka snem ha katei ka thain.

Hynrei kaba la pynbitar eh ia kitei ki nongialam seng bad nongialam shnong jong katei ka thain, la dei hadien ba ki la iohi ba kaei kaba la pynmang da ka sorkar ha kito ki por, mynta ka la shu sahkut shiteng por khlem da lah ban pyndep kumba la thmu, hynrei ka la shu sahkut noh tang shiteng.
Kumta na ka sur kaba la mih na kitei ki nongialam seng bad nongialam shnong, ki la dawa na ka sorkar ba ka dei ban btah ia u Kontraktor uba la ioh ban pyntrei ia kagtei ka kam, ba u dei ban pynteei noh mardor, khnanogn ba kan long ka jingmyntoi ia ki paidbah ha katei ka thain.