Ba rem palat ka bai sumar, ha ki hospital shimet, pan kaiphod ka sorkar na ka Health department

Shillong: Mynta ka sngi ka 25 tarik u Jymmang 2021, hadien ba ka Sorkar Jylla ka la dep ban shong ia ka jingialang hapoh ka jingialam jong u Mynti Rangbah ka jylla, u Conrad K Sangma, ka Sorkar ka la rai ban dang pynbun ki kamra bad ki jaka khiah na ka bynta kito kiba ioh ia ka khlam Covid-19 haph Shillong bad ha kylleng ka Sor Shillong bad hynne ka step ka tnad jong ka koit ka khiah ryngkat bad kiwei kiwei ki tnad ki la leit ban khmih dalade ia ki jaka kiba la thmu ban buh ia ki Corona Centres ha kaba kawei kadei ha ka ophis jong ka ITI kaba don ha Rynjah, ka mala bathymmai jong ka BTC kaba don ha Malki bad kawei pat ka dei ka Directorate of Commerce and Industries kaba don ha Nongrim Hills bad yn sa pynmih haduh 150 tylli ki jingthiah ha kitei ki Corona Centre.

U Bah Prestone u la iathuh ruh ba hadien ba ka Sorkar ka la iohsngew ia ka jingud jingnam jong kiba bun ki paidbah kiba leit phah sumar na ka daw ba ki la ioh ia u Covid-19 ha ki jaka sumar shimet ne ki private hospital ba ka bai hospital ka rem palat, kumta na ka liang jong ka Sorkar ka la aiti ha ka tnad ka koit ka khiah ba kin phah sha ka sorkar ia ka jingai jingmut, khnang ba na ka liang ka sorkar kan peit ba kumno ka lah ban don bynta ha ka ban weng ia katei ka jingeh jong ki paidbah kaba ki duk ki suk bad ki rangli ki juki ki iakynduh jingeh namar kane ka khlam Covid-19 kaba la iai syllad tyngeh katba dang mih ki sngi bad ka Sorkar ka la aiti ha ka tnad ka koit ka khiah ba ka dei ban pyndep ia katei ka kam hapoh ka 48 kynta khnang ba ka Sorkar kan ioh ban shim ia ka rai kaba khadduh bad kane ka kynthup iakito ki longiing longsem kiba la duh noh ia ki baieid bathoiñ ne ia ki kmie ki kpa jong ki ha kane ka jingshah lynshop kaba ar ne ka Second Wave jong une u Covid-19.

U Bah Prestone u la ong ruh ba na ka liang jong ka Sorkar ka don ryngkat lang beit bad kito ki longiing longsem kiba hap ban mad ia ka jingsngewsih bad ka jingkthang ha ka mynsiem ka jong ki namar ka jingduh noh jong ki ia ki baieid bathoiñ jong ki bad na ka liang ka Sorkar kan iai ai mynsiem beit bad kan iai don bynta lang beit bad ki ha ka jingkitbok kitrwiang ba ki ia ioh ia ka met kaba shait kaba khlaiñ ia ki khun ki kti, kiba ha iing ba hasem baroh.

Shuh shuh u Bah Prestone u la ong ha kaba iadei na ka bynta ki nongkyndong ia ka jingsumar na ka bynta kito kiba ioh ia une u khniang Covid1-9, ka la don ka proposal na ka liang jong ka tnad ka koit ka khiah ba dei ban buh da kumno kumno 15 lane 20 jingthiah ha kawei pa kawei ka CHC bad PHC ha kylleng sawdong jong ka jylla ka jong ngi bad na ka liang ka sorkar ka la aiti biang ia kane ka kam ha ka tnad ka koit ka khiah ba kan khmih bha ha kaba iadei bad ka bailut baisep bad la ai por hapoh 48 kynta ba kin pyndep ia kane ka jingkhmih jong ki ha kaba iadei bad kane.

Ka jingiakren kaba khadduh jong ka Sorkar ka long ba ka la shim ruh ia ka rai ha kaba iadei bad ka proposal kaba la wanrah na ka liang jong ka tnad Agriculture kata ka long na ka liang jong ka tnad Agriculture ki la dep wan jurip bad khmih ia ki katto katne tylli ki jaka ban pynlong kum ka wholesale bad ruh ka retail market katkum ka jingpynbeit jong ka tnad Agriculture bad na ka liang jong ka Sorkar ka la dep ban mynjur ruh ia katei ka proposal. Ki jaka kiba la mynjur da ka sorkar bad tnad Agriculture ki long :

1. Ka 5mer farmer’s market
2. Ka 7mer farmer’s market hapoh Umdiengpun.
3. Ka Mawkasiang Football Field.
4. Ka Urkaliar Samkhamti Parking Lot.
5. Hapoh Shiliang Um ha Lawmei
6. Ha Mawryngkneng,Sohryngkham bad Smit.
7. Hapoh Marbisu Lawai
8. Hapoh Laitkor.