Ba pyut ei u sohphan, thmu pyniaid iew ka sorkar

Shillong,
17 Rymphang:
Ka sorkar jylla ka la thmu ban pyntreikam da ka skhim na ka bynta ban pyniaid iew ia u sohphan uba shu pyut ei ha kane ka jylla kaba mih kyrhai une u kynja soh.
Ka sorkar mynta ka la thmu ban pyniaid iew ia une u sohphan lyngba ka skhim Integrated Basin Development and Livelihood Promotion (IBDLP)  khnang ban long shi bynta ka lad kamai kam ia ki briew ban kyntiew ruh ia ka ioh ka kot na une u soh.
Haba kren mynta ka sngi sha ki nongthoh khubor, u Registrar ka Cooperative Societies u BDR Tiwari u la ong ba u sohphan u dei uba mih bun bha ha kane ka jylla hynrei kam don kano kano ka jingshim khia na ka liang ka sorkar ban pyniaid iew.
Haba iathuh ba ia  u  sohphan lah ban pyndon kam ha kiba bun rukom, u Tiwari u la ong ba ka jingthmu jong kane ka IBDL ka long ban pynroi shuh shuh ia une u sohphan ban kyntiew ia ka ioh ka kot jong ki nongrep khamtam ha ki jaka nongkyndong ha kane ka jylla.
U la ong ba u dieng jong u sohphan u lah ban bat ia ka khyndew bad u iada na ka jingtwa ka khyndew nalor u long ruh uba larkam ban shna ia ki tiar tem tiar put.
Katkum ka jingong u Tiwari, la kumno kumno kumba 4-5 lak tylli ki dieng sohphan ki don ha kane ka jylla Meghalaya.
U Tiwari u la ong ba bun jait ki kynja soh  ba lah ban shna jingbam na u sohphan uba de u mar uba ka jylla ka lah ban pynmih bad ka wan basaw ha ka jinglah ban pynmih ia une u soh. Une u kynja soh u dei u bym donkam ban pynlut por ban sumar nalor bun ki jingdonkam bal ah ban ioh na ka dieng jongu.
Ka tnad ka kwah ban iateh bad ki society na ka bynta ban pyniaid iew ia une u sohphan bad ka sorkar ka lah ban iateh ruh bad ki kompeni ban pyniaid iew kham bha ia une u soh.