Ba pyrshah jaka rung mynder ki seng Garo; ther ka KSU, RBYF

Nongpoh, 30 ‘lyngkot:
Tang hadien ba la mih ka jingpyrshah na ki katto katne tylli ki kynhun sengbhalang na Garo Hills, halor ka jingthmu jong ka sorkar ban buh ia ka jaka rung ki mynder ha Umpher, 12Mer, Ri Bhoi District, ki ar tylli ki kynhun sengbhalang ba kham paw ha ka jylla ba kynthup ia ka KSU, NKHD bad ka RBYF, Sengkmie, ki la pynshai kylla da kaba ong, ba ka daw kaba la mih katei ka jingpyrshah ka dei tang namar ka jingialam bakla da ki katto katne ngut ki riew khwan myntoi shimet.
Lah ruh ban pynkynmaw hangne, ba dang shen ki kynhun sengbhalang na Ri lum Garo ba kynthup ia ka GHSMC, AYC bad AAYF, ki la leit ban kynduh bad phah ruh da ka dorkhas sha u Myntri Rangbah ka sorkar jylla, kiba la kyntu ruh ia u Myntri Rangbah ba u dei ban pynsangeh noh ia ka jingthmu ban tei ia ka jaka Talasi mynder ha katei ka jaka kaba don ha Umpher.
Haba iakren bad ki nongthohkhubor, u Samla Ferdynald K. Kharkamni, President ka KSU, NKHD bad u Bah Bipul Thangkhiew, President ka RBYF, ki la ong ba ka daw kaba hakhmat kaba wanrah ia katei ka jingpyrshah halor ka jingthmu ka sorkar ban buh ia katei ka jaka Talasi mynder ha katei ka jaka, ka dei na ki trai jong ki katto katne tylli ki Karkhana Otdieng beain kiba don marjan bad katei ka jaka, kiba la pynsngewthuh bakla ia ki paidbah nongshong shnong ha katei ka shnong.
“Watla ki bor ba dei peit bun sien ki la leit ban khang khyrdep ia kitei ki Karkhana Otdieng beain, hynrei kim shem la sangeh satia, kumta ha kane ka jingthmu ka sorkar ban buh ia ka Exit Point ha katei ka jaka, tang namar ba ki tieng ioh ba kan shah ktah lang ia ki ruh bad kumta ki la sdang ban shim kabu da kaba pynsngewthuh bakla ia ki briew kiba shong ha katei ka shnong, namar bun na ki briew kiba don ha katei ka thain ki dei kiba dang sahdien ha kiba bun ki liang” ong kitei ki nongialam seng.
Katei ka jaka ka dei jong ki riew shimet bad ha kajuh ka por ka dei ruh ka jaka kaba biang bha na ka bynta ban shna ia katei ka Exit Point, namar ba kam shem la ktah satia ia ki surok shnong bad ha kajuh ka por ka la jngai na ka St’ Jude’s Secondary School bad ka Conservation Training Institute, Byrnihat, la bynrap kitei ki nongialam.
Ha kajuh ruh ka por, ki la ong ruh, kaei ka jingktah na katei ka jingthmu ka sorkar ban buh ia ka Facilitation Centre ha katei ka jaka, hato ka jingshna ia ki Petrol Pump bad ki Karkhana kiba heh ha katei ka thain pat kam don jingktah, la buh jingkylli kitei ki nongialam.
Kum ki nongialam seng hi, kim kwah ba kan don kano kano ka jingiapher hapdeng jong ki Jaitbynriew Khasi bad Garo, hynrei ngi pynrem pat halor ka jingshim kabu da ki riew khwan myntoi shimet, tang namar ka jingmyntoi shimet ka jongki, ki la bynrap.