Shillong: Ki dkhot ka HYC Shella Area unit ki la phet lut na ka seng hadien ba ki la kynnoh ba kim sngew tynnad ia ka rukom tuklar u general secretary seng kmie ka HYC u Bah Kupar Roy Synrem.
Haba kren sha ki nongthoh khubor, u president ka HYC Shella Area u Bah Macdonald Mawa uba la phet noh na ka seng lem bad baroh ki dkhot, u la kynnoh ba ka jingphet seng lut ki dkhot kam dei ba isih ia ka HYC hynrei namar ba kim sngew tynnad ia ka jingleh jong u general secretary u Bah Kupar Roy Synrem uba dei na shnong Shella hi, namar ba u la tuklar ia ki kam ba ka unit ka treikam ha kiba bun ki kam, naduh ka kam shnong, bad kiwei.
“Ngi la mih noh baroh na ka HYC Shella Area unit namar ba ngi pyrshah ia u general secretary ka HYC seng kmie u Bah Kupar Roy Synrem, uba dei hi na shnong Shella halor kiba bun ki mat treikam ka unit bad kiba long pyrshah ia ki paidbah ka Shella’, la ong kine ki dkhot baphet noh na ka HYC ha ka shithi ba la phah sha u president bah Robertjune Kharjahrin.