Ba pyrshah ia ka jingdawa long Rangbah Shnong ki Garo, kynduh CEM bad Hima Mylliem ki Seng Samla Shnong Byrnihat

Nongpoh:Ki nongialam ka Synjuk ki Seng Samla Shnong Byrnihat Area ha Ri Bhoi, mynhynnin ka sngi ki la leit ban kynduh bad phah jingthoh sha u Chief Executive Member (CEM) ka Khasi Hills Autonomous District Council (KHADC) bad sha u Syiem ka Hima Mylliem, na bynta ban pyrshah jur halor ka jingdawa da artylli ki kynhun Garo kiba kynthup ia ka All Ri Bhoi Garo Headmen Association bad ka All Khasi Hills Achik Federation, ki la leit ban kynduh ia u Myntri Rangbah ka sorkar jylla, na bynta ban dawa na u ba dei ban ailad noh ia ki Paid Garo ban long Rangbah Shnong ha ki katto katne ki shnong kiba don ha ka thaiñ Byrnihat.

Kitei ki nongialam ka Synjuk, la lamkhmat da u Samla Kitbor Suting, Chairman ka Synjuk, nangta u samla Ricky Lapang bad kaba la synranglang ruh da u Bah BB Makdoh, Chairman ka Synjuk ki Rangbah Shnong Ri Bhoi District u Bah B.B Makdoh, ki Rangbah Shnong ka thain, ka Synjuk ki Seng Samala Shnong Shillong City lem bad kiwei.

Katei ka long ba nyngkong ki la leit ban kynduh shwa ia u CEM ka KHADC bad hadien kata pat, ki la leit ban kynduh sa ia u Syiem ka Hima Mylliem bad kiba la ïoh ban pynsngew lut sha ki halor ka jingsngew pyrshah jong ki halor ka jingdawa da kitei ki kynhun na ki paid Garo.