Ba pynkhreh ka sorkar ia ka jaka khynra mynder, ai khublei ka FKGJP North Khasi Hills

Shillong: Ka Federation Of Khasi Jaintia & Garo People (FKJGP) North Khasi Hills District ka ai khublei kyrpang ia ka sorkar MDA hapoh ka jingialam jong u Conrad K. Sangma kum u Myntri Rangbah jong ka Sorkar Jylla halor ka sienjam ban tei noh ia ka khyrdop khynra mynder, khamtam eh ha ka them Ri-Bhoi kaba long ka lynti bah jong ki briew kiba wan lyngba jong ka jylla Assam.

Ka Seng ka la angnud la slem ban iohi ia ka jing shimkhia na ka liang jong ka sorkar ban teh lakam bad ban pyrkhing ia ka jingrung jingmih laitlan jong ki bar jylla bad ki mynder sha kine ki Ri Lum Khasi, ha ki rukom kiba pher bapher. Kumban shu pynkynmaw hangne ba ka Central Executive Committee (CEC) jong ka Sengkmie dang ha kine ki khyndiat taiew ka la byrngem ba kum ka Seng kam banse ban shim da kiwei pat ki sienjam, wat la ka dei ban shim da ka rai kaba tyngeh ban pynlong ia ki jingiakhih kiba jur lada ka sorkar Jylla kam sdang satia ban pyni noh da ki kam ban tei iaki khyrdop kynra mynder (Entry & Exit points) hapoh jong u bnai Jymmang 2019 namar ka seng kam lah shuh ban ap ban ban shu shong kli kti halor ka jingrung bad jingmih laitlan jong ki mynder bad ki bar Jylla.
Ka FKJGP North Khasi Hills District ka sngewthuh shai kdar ba katei ka kyrdop kaba la sdang pyntrei shait shait mynta ha ki bynta jong ka shnong Umling kaba dei ruh ka jaka jong ka sorkar jylla bad ka dei kaba tang shipor, hynrei kan iarap shikatdei pat ban tehlakam ban khanglad ia ka jing wantuid kyrthep jong ki mynder sha kane ka jylla. Kumta ka seng ka kyntu ia ka sorkar ba ka dei ban pynsted ruh katba lah ymtang ia ka jingtrei, hynrei ia ka jing treikam jong katei ka khyrdop khynra mynder, khnang ba kan long ia ka jingiada ia ka jaitbynriew na ka jing shah taplep ha ki mynder.