Nongstoin, 13 ‘lyngkot:
Tang hadien katto katne por ba u Deputy Commissioner ka West Khasi Hills District u bah S.Kharlyngdoh u la pynjari da ka kyndon 144 CrPc ha shi lynter ki jingkieng na Wahlyngdoh shaduh Risiang jongka surok Nongstoin – Maweit, ki runar ki bym shym la lah satia ban tip la ki dei kiei ha ka janmiet jong ka sngi thohdieng jong ka taiew ki la thang syndon ia kawei ka jingkieng dieng kaba don ha ka shnong Risiang.
Katkum ka tyllong khubor bala ioh lum katei ka jingjia kala jia ha ka por 7.00pm janmiet bad ka khubor ka iathuh ruh ba katei ka jingshah thang ia katei ka jingkieng la suba ba khlem pep kalah ban dei namar ka jingdom bad bitar jong ki briew kiba don kam ban iaid khamtam ki trok kit dewiong ki ba la ieng lain da ki spah tylli ha katei kajaka kiba thmu ban wan kiew sha Nongstion hynrei namar katei ka jingpynjari kyrkieh jong u DC ki la shu sah kut noh bad pynbitar ruh ia ki nongniah trok.
Shuh shuh ha kaba iadei bad katei ka hokum ia kaba u DC u la pynmih kala wan hadien ba na ka liang u EE ka PWD Road Nongstoin u la ai ia ka jingpyntip halor ki jingsynjor jong ki tei ki jingkieng namar ka jingiaid khah khah jong ki trok, kumta khnang ban pynlait ia kino kino ki jingjia ba pynthut ia ki paidbah baroh, na ka liang u DC u la pynjari ia katei ka kyndon ha kaba la khang pyrshah ia baroh ki trok heh ba kin iaid lyngba kitei ki jingkieng.
Hadien bala ioh jingtip halor katei ka jingjia ki katto katne ki nongthoh khubor ki la hiar sha ka shnong Risiang ha kaba la lap ruh ba katei ka jingkieng dieng ka la iing lut khoit.
Phi don ban ong eiei?