Ba pyniap suba ai ksuid “Wat shim ia ka ain ha ka kti” ong u myntri   

Shillong: U Myntri uba dei ban peit ia ka tnad kam pohing u bah Lakmen Rymbui, myn hynnin ka sngi u la buh ia ka jingkyrpad ba na ka liang ka sorkar jylla ka buh ia ka jing kyrpad ia ki paidbah ba kim dei ban shim ia ka ain ha ka la kti tang na ka daw ba ki don ia ka  jingtharai sniew men ai ksuid.

Haba iakren bad ki lad pathai khubor na ka liang u bah Lakmen u la ong “Ka jingtharai sniew nong ai ksuid kam dei kaba thymmai tang ha kine ki khyndiat bnai la iohi ia ka jingjia ba sngewsih ha ki thain Mawkynrew bad mynta ha ki thain West Khasi Hills District,hynrei na ka  liang jong nga, nga kyrpad ia ki briew ba kim dei ban shim ia ka ain ha ki kti, hynrei ki dei ban pyntip sa ki pulit lada ka don kum kata ka jingjia.”

U la ong ruh ba ki briew mynta ki la shai bad kum kane ka jingjia ka la duna bha, hynrei kaba donkam mynta ka long ba na ka liang jong ka bor shnong ba ki dei ban don ka jinghikai ia ki nongshong shnong jong ki halor kane ka bynta ban lait na kino kino ki jingjia ba sngewsih.

U la kyntu ruh ba lada don  kano kano ka jingtharai sniew ia kino kino ki briew ruh ki briew kim dei ban shim ia ka ain ha la ki kti, hynrei ki dei ban  pynshisha bad ki dei ruh ban aiti ha ka kti jong ka ain ia kine ki briew kiba ki don ka jingtharai sniew ba ki leh byrtong.

Kum ban shu pynkynmaw ha ka 7  tarik u Risaw 2020 u wei u briew u ba la tip kyrteng kum u Moris Marngar 70 snem ka rta, u la shah pyniap da ka ba tep im ha la ki jong ki pyrsa ha ka shnong  Nongdisong ha West Khasi Hills na ka daw ba ki don ka jingtharai sniew ba udei u nongaiksuid bad u nongleh byrtong.

Na ka liang u bah Lakmen u la iathuh ba haduh mynta, ki la don kiba la shah kem bad mynta kane ka Case ka dang don hapdeng ka jingtohkit.
U bah Lakmen u la ong ba ha kaba iadei bad kane ka jingkynnoh nongaiksuid lane nongleh byrtong, ki bun ki briew ki ba la ngat ha kum kine ki jingjia ki ba sngewsih, hynrei ka ain kum ka IPC bad ka CRPC ka la don lypa ban khang lad ia kum kine ki  jingjia bad na ka liang ka sorkar kam don kam ban thaw da kawei pat ki ain na ka bynta kine.