Ba poi pahara ki BSF ha ki iing briew, pyrshah jur ka Dorbar Shnong Umkiang

Shillong: Ka Dorbar Shnong ka pynpaw ia ka jingpyrshah kaba jur ia ka jingap pahar ki shipai BSF Umkiang BOP, hapdeng Shnong Umkiang, kata ha Petrol Pump (Wahkhian), NH-6 khlem ka jingbit na ka Dorbar Shnong. Kane ka jingleh jong ki shipai BSF ban ap pahara (duty)ha ka por mynmiet ha iing briew bad dukan ka la pyntieng pynsmiej ia ki nongleit nongwan, ki nongdie nongthied bad khamtam ia kito ki briew bashong basah ha katei ka jaka khamtam ki kynthei khynnah. Ha ka jingshisha ki BSF ka kamram jong ki ka long ban ap pahara sha Border/ Fencing khnang ban teh lakam ia ka jingrung jingmih beain jong ki briew kiba na bar ri (Rohingya/ Bangladeshi).

Kumba paw ki dak ki shin ba ka jingrung kyrthep jong ki mynder ri (illegal migrants) shapoh u pud u saw jong ka India, ka dei ka jingtlot hi ki bor ba dei peit ia ka Border (BSF). Namar ha ka jaka ban ap pahara ha Culvert (Fencing), ki ap pahara pynban ha surok NH-6 ne ha iing briew ba don hapoh Shnong Umkiang. Katba ki BSF ki dang muja ban ap pahara ha Surok NH-6 ki khar Bangladeshi ki wan rung suk shapoh ki kper ki ksah jong ki briew India, ban tuh kwai, tympew, bad ki jingri kum ki masi ki muid bad kumta ter ter.

Ka Shnong hadien ba ka la tip ia kane ka khubor ba ki BSF ki ap pahara ha iing briew/ Petrol Pump, ki nongialam Shnong wut wut ki la leit sha katei ka jaka ban ia kren bad kitei ki BSF, hynrei kitei ki BSF ki la pyneh pynban bad khlem sngap ne treh ban mih noh ki iing briew ban leit ap pahara sha Border.

Hynrei dei tad ha ka sngi kaba bud ha ka tarik 31tarik Nailar 2022, ka Shnong ka la leit ai da ka jingthoh sha u Deputy Commissioner, East Jaintia Hills, halor katei ka jingap pahara beain jong ki BSF ha iing briew bad ha pdeng shnong Umkiang. Bad ia kane ka jingthoh ruh la phah copy sha u SP, East Jaintia Hills District ban leh ia kaba donkam. Ha ka jingshisha ka Shnong ka don ki VDP ban peit ia ka bha ka miat jong ka Shnong, nalor ka jingdon jong ki Pulit (MLP), ym dei ki BSF ki ban peit ia ka shongsuk shong shngain hapoh ka shnong ka thaw.

Kumta la kyrpad ia ka Sorkar kum u DC, SP East Jaintia Hills District, ban tuklar ia kane ka kam leh donbor jong ki shipai BSF ha ka por mynmiet, khnang ba kan nym mih kino kino ki jinghuri hura hapdeng ki paitbah nongshong Shnong bad ki BSF bad ban wan rah ruh ia ka shong suk shong shngain. Bad wat lada ka Shnong Umkiang, ka la ai ia ka jingujor sha u DC, SP East Jaintia Hills District, kine ki BSF kim shym burom ia ka Shnong ne ka ain.

Kyntang iawai ka Dorbar Shnong ka ai ka jingkyrshan ia ki shipai BSF, tang lada ki leh ha ka rukom kaba dei ne ban ap pahara sha Border, khnang ban lait na kino kino ki kam bymman jong ki mynder ri (Bangladeshi), kiba wan ban tuh ban thiem ia ki jingdon ki jingem jong ki nong India la ka long ha ka por mynsngi ne mynmiet.