Ba phet ki MLA sha Guwahati, bunkam ka tnga U Uddhav ban wad ia ki tnga jong ki MLA

Mumbai: Ka jing ia kynad sain pyrthei, ka dang iai bteng ha kine ki sngi ha Maharashtra bad ha kaba kum kane ka por, ka la poi sa ka pali jong ki tnga jong ki MLA, ba kin tuklar lem, na ka bynta ban pynneh ia ka sorkar Shiv Sena ha katei ka jylla.

Ha ki khyndiat sngi ba ladep, la iathuh ba ka Rashmi Thackeray, ka tnga jong U Uddhav Thackeray, ka la sdang ia katei ka phang, da kaba iakren bad ki para kynthei, ba kin wad noh ia la ki tnga ki jongki bad katei ka long, ba kin iakren ia la ki tnga, ba kin wan phai noh sha Mumbai bad ba kin ia poi noh sha ka jing iabeit ban pynneh ia ka sorkar jong ka Shiv Sena.

Kiba bun na kine ki MLA, ki don mynta ha ka hotel ba remdor bha ha Guwahati, ba la ialam da U Eknath Shinde, u nongialam ka kynhun pyrshah jong ka Shiv Sena bad kitei ki kynthup ia 37ngut ki MLA jong ka Shiv Sena bad 10ngut ki MLA shimet.

Ka jingdon ki MLA ha ka dorbar Maharashtra, ka long 287ngut bad lada ka poi ka jing ia tynjuh bor, kin don 144ngut baroh. Ia mynta ka sorkar synrop, jong ka Shiv Sena, NCP bad ka Congress ka don 169 ngut ki MLA. Lada jia ba ki MLA, ialam da U Shinde, kin resain noh, kum ki MLA, kumta ka sorkar Maha Vikas Aghadi’s (MVA), kan duna briew bad ka sorkar U Uddhav Thackeray, kan khyllem noh artad.