Ba phet ka tnga U MP ka BJP sha TMC, u pan ia pyllait sanshyieng syndon

Ka la mih ka jingjia, kaba i khyllah ka sain pyrthei ha West Bengal bad katei ka long ba ka tnga jong U Saumitra Khan, uba dei U MP jong ka seng BJP, ka la pyn iasoh ialade sha ka seng Trinamool Congress, hynnin ka sngi.

U Saumitra Khan, ula bitar shla, ia ka jingleh jong ka tnga jongu bad ula rai ruh ban ia pyllait san shyieng noh, na ka jing ia dei tnga jongki, kaba la shiphew snem kynthih.

U Saumitra Khan, uba kren da ka jing jaw ummat, u kitbok ia ka tnga jongu, ha ka jingleit iasoh jongka sha ka seng TMC, hynrei ha kajuh ka por, u kynnoh, ba katei ka jingjia, ka dei lyngba ka jingleh buit tuh uwei na ki nongpeit kti, ha kaba ula bthah ia ka Sujata, ba kan pyn iasoh ialade sha ka seng TMC bad u da pynthikna, ba lada ka iasoh sha katei ka seng, kan sa ioh ia ki kam kiba heh ba heh. U Khan, ula bthah ruh ia ka Sujata Khan, ba ka dei ban weng shi syndon ia ka jait jongu, na ka jingshim jait jongka ialade.

“Ka TMC, ka la ioh ban tuh ia ka Lakshmi jong ka iing jongnga. Ngam tip, ia kaei kaba ki kular ia ka, lehse kin lah ban pynlong myntri rangbah ia ka, hynrei nga shu kyrpad ia ka, ba kan weng noh ia ka jait Khan, na ka jingshim jait jongka” ong U Saumitra Khan.

Hadien katto katne por, ka Saujata, ka la pynphai ktien kylla, da kaba ong “Ngam tip mano ba hikai ba un kren kumne bad ngam ju pyrkhat satia ban pyn pait ia ka jing iadei shi tnga jongngi. Ki don ki briew ki bym don iing don sem ialade, ki sngew bang ban pynpra ia ka iing kiwei pat” bad ka da ai nuksa ia kiba bun ki iing, kiba don ha la ki jong ki jong ki seng sain pyrthei.

Ka Mondal, ka ong shuh shuh “Ngam kwah ban leh ia kaei kaei kaba sniew pyrshah ia u. Donbok ba un kiew ha baroh ki kam ki duk jongu. Lada u dang khein ia nga, ba nga dang dei ka tnga jongu ruh ka biang hi, hynrei nga dang tah ia u sindoor, ha ka kyrteng jongu” ka la ong.

Ha ka elekshon MP jong u snem 2019, ka Sujata, ka la trei hi marwei, ha ka Constituency jongu tnga jongka, namar ba la khang ia u, ba un run ha Bankura, kaba dei ka Constituency, ba u iakhun, da ka hukum ka Calcutta High Court, halor ka jing kynnoh ba u dei uba dawa pisa na ki briew.

Ka Sujata, ka la trei bor bah bad ka la pynjop ia u, da 78,047 vote, ha ka jing iakhun pyrshah ia u kandidet ka Trinamool Congress, U Shyamal Santra bad ka khlem pynlong jing ialang paidbah lane iaid ha ki surok bah.