Ba niewbein u Dy. CM ia ki rangbah shnong, byrthen ki MDC

Shillong, 24 Jylliew:
Mynta ka sngi ki MDC ka KHADC ki la sngew bitar jur ia ka jingniew bein jong ka sorkar jylla ia ki nongsynshar shnong ha kane ka jylla.
Haba wanrah hynne ia kane ka ishu, u MDC ka Sohra u Bah Titosstar Well Chyne u la ong ba katkum ka shithi ba la phah da u Deputy Chief Minister ka jylla u Bah Rowel Lyngdoh uba peit ia ka Soil and Water conservation sha u Secretary ka KHADC, la bthah ba ki nongsynshar shnong ka thain Sohra kim dei ban tuklar ia ki kam jong ka sorkar.
U MDC ka Sohra uba la wanrah ia kane ka shithi, u la ong ba kane ka jingleh jong ka sorkar lyngba u Dy CM ka la pyni shai ba la niew bein ia ki nongsynshar shnong.
Kane ka jingthoh pyrshah u Dy CM ia ki nongsynshar shnong ka thain Sohra ka long hadien ba ki la pyrshah jur ia ka sorkar ba kan rah noh ia ka T. 27 klur kaba dei ka bhah na ka bynta ban pynjyrngam ia ka thain Sohra.
Ki nongsynshar shnong ka thain Sohra ki la dawa ba ka sorkar jylla kam dei ban pynduh ia ka bhah jong ka Sohra wat tang shi naia ruh kumba la ai da ka sorkar pdeng lyngba ka planning Commission.
U la ong ba haba ka sorkar ka donkam ia kano kano ka kam, ka khot ia ki nongsynshar shnong ban iakren ban iaphylliew jingmut hynrei kane ka shithi ka long ba kam khein snep. “Ka KHADC ka dei ban ai jubab ba ka sorkar ka dei ban weng noh shi syndon ia kane ka jingthoh ban niew bein ia ki nongsynshar shnong”, la ong u Bah Titos.
Ia kane ka ishu ba la wanrah u MDC Sohra la kyrshan da u MDC ka Mairang Bah Rasor Rani, u MDC ka Rambrai Bah KP Pangiang, u MDC ka Jaiaw Bah Adelbert Nongrum, MDC ka Mawthungkut Bah FK Rynathiang, u MDC ka Mawlai Bah Embhah Syiemlieh.
Haba jubab halor kane, na ka liang u CEM Bah Pynshngainlang Syiem u la ong ba ka EC kan ym tieng ei ei ban jubab sha ka sorkar ban ong em ia kaba dei ban ong em bad ban ong hooid ia kaba dei ban ong hooid.