Ba lip bor ding khah khah, leit ujor ka FKJGP, ha u myntri jylla

Shillong:Ki dkhot jong ka Federation of Khasi Jaintia and Garo People, myn hynnin ka sngi ki la wan ban ia kynduh ia u myntri ka tnad bording u James PK Sangma ban ia kren halor ka jingshah pynlip bording kaba khah khah ha ka jylla.

Haba iakren bad ki lad pathai khubor na ka liang u General secretary ka FKJGP u bah Dondee C. Khongsit, u la iathuh ba na ka liang ka seng ka la wan ban ia kynduh, na ka daw ba ka jylla ka mad ia ka jingshah pynlip bording kaba khah khah, ha kaba ki la kyrpad ia u myntri ba kane ka jingmad ia ka jingshah pynlip bording kam dei ban ktah ia ki khynnah pule kiba don examin.
U bah Dondee, u la iathuh ba na ka liang u myntri u la iathuh ia ki ba ka daw hi kaba ka jylla ka mad ia ka jingshah pynlip bording ka dei namar ka jingshah ram ka ba la slem bad na ka liang ka sorkar ka la ialeh ban wad ia ki lad ki lynti ban weng ia kine ki jingeh.

Ka seng mynta ka sngi, ka wan ruh ban buh ia ka jingkylli ia u myntri ka tnad bording, halor ka jingthung ia U Chettri kum u Director ka Distribution ha MeECL, namar ba une u briew u dang dei u ba rit kyrdan, haba ia nujor bad ki ophisar khasi kiba la trei slem ha kane ka tnad,ha kaba na ka liang u myntri u la kular ba un sa bishar bniah halor kane ka bynta.
Ki dkhot ka seng ki la buh ruh ia ka jingkylli halor ki nongtrei jong ka Annual Maintenance na ka bynta ki sub station, namar ba kat kum ka jingtip jong ka seng baroh shi katta la ju pynbha da ka tnad hi ia ki sub station, hynrei mynta ka sorkar ka thmu ban ai noh ia kane ka kam sha ki Company ba shabar bad na ka liang u Myntri u la iathuh ia ki nongialam ka seng ba yn sa peit bha ia kane bad yn pynthikna ba ki nongtrei, ha kane ka tnad kin ym duh kam lada ai noh sha ki company ruh.

Ki nongialam ka FKJGP ki la iathuh ruh ba kawei kaba ki la iakren bad u myntri ka tnad bor ding ka dei halor ki contractual ophisar, ha kaba ka sorkar ka dei ban pynrung ia kine ki ophisar ha ka Reservation policy bad na ka liang u myntri u la kular ba yn sa pynmih da ka order, ban pynrung ia kine ki ophisar ha ka reservation policy.