Ka Dubai, ka la thaw hi ia u slap lajong ha kine ki sngi bad ka daw, ka long namar ba ka jingshit, ka la palat than ha katei ka Ri bad kumta, ka Ri United Arab Emirates, ka pynher da ki drone sha suin, ha kaba kitei ki drone, ki ia tyngkhuh bad ki lyoh bad kitei ki drone ki kynthah ia ki lyoh da ka ilektrik bad kumta ki lyoh ki kylla um bad ki kylla slap. La iathuh ba ka jingshit jong ka mariang ha Dubai ha kine ki sngi, ka long 122 degrees Fahrenheit (50 degrees Celsius).
Ka UAE, ka dei kawei na ki Ri, kaba duna slap shibun ha ka pyrthei bad mynta, ka dang thaw ia ki buit jingstad jongka, ban pynmih kham bun u slap ha katei ka Ri.
Lyngba katei ka jingstad thymmai, ka National Center of Meteorology jong ka UAE, ka pyni, ia ki dur jong ka jinghap slap kaba jur shi katdei, ha kaba u slap, ula ther tyngeh ha ki surok bah, ha ki shong ki thaw jong katei ka Ri. Ym tang katta, ki la sdang mih ruh ki kshaid ha ki rud shnong jong ka nongbah Dubai.
Katei ka jingstad, kam dei tangba ka leit pyn kylla um ia u lyoh, hynrei, ka don ruh ia ka jingstad ban pynmih ia u lyoh ha suin bneng bad na utei u lyoh, ki siat ban pyn kylla slap.
Ka UAE, ka don mynta ia ka projek kaba $15 million (£10.8m), na ka bynta ban wad slap bad ka UAE, ka dei kawei na ki shiphew tylli ki Ri jing ka pyrthei, kaba duna slap bha, ha kaba ka jing hap slap, ka long tang lai inshi lane 78 millimetres bad kaba long 15 shah ka jingduna, na ka jinghap slap ha United Kingdom.
Phi don ban ong eiei?