Ba leh torti ka MePDCL shah bat bording i heprit ha Mawkohphet; dawa bai lut ksan ba shi jingim ka KSU SWKHD

Shillong: Ka Khasi Students’ Union(KSU) South West Khasi Hills District, mynhynnin ka sngi ka la phah ïa ka dorkhas jong ka sha u Chief Engineer ka tnad sam bording ka MePDCL ban dawa ba ka tnad ka dei ban siew bai lut sha i heprit Ibapynhun Iawphniaw iba dang lai snem ka rta khun jong i Kong Katbina Ïawphñiaw bad u Bah Synsharlang Syiemlieh na ka shnong Mawkohphet, South West Khasi Hills District i la hap ban duh noh ïa baroh artylli ki kti bad mynta i dang don hapdeng ka jingshah sumar.

Kane ka jingjia ka KSU ka la ong ka wan jia dei na ka jingleh sting bad ka jing bym don jingkitkhlieh jong ki bor ba dei peit ha kaba watla u Transformer u don hajan jongka Skul hynrei ym shym la ker satia ban ïada na kino kino ki jingjia ba sngewsih bad ban teh lakam ïa ki khunlung khynnah ban ïoh leit ïalehkai sha ka jaka ba u don.

Haba iadei bad kane ka ksu, ka dawa ba ka MePDCL mardor ka dei ban siew bad pynbiang ïaka bai sumar bad kiwei kiwei ki jinglut kiba ïadei bad ka jingphah sumar ïa ine i heprit naduh kaba sdang bad haduh ba in da mih na ka jaka sumar. Ha kajuh ka por ka Seng ka dawa ba dei ban pynbiang ïaka bai bam ha shilynter ka jingim(lifetime compensation) jong ine i heprit namar kane ka jingduh noh jong i ïa baroh ar tylli ki kti ka la pyn kylla long anna ïa i. Kane kala buh jingeh ïa i bad pyn jynjar ruh ïa i ha ka lawei kaban sa wan jong i. Ka seng ka dawa ba na kane ka tnad ba ka dei ban leh eiei mardor halor kane ka bynta bad lada ki bor ba dei peit kim patiaw na ka liang jong ka ka la byrngem ban shim da kiwei pat ki lynti ban pynthikna ba ine i heprit in ïoh ïa la ka hok.

Shuh shuh ka KSU South West Khasi Hills District Unit ka dawa ruh naka tnad MePDCL ba ka dei ban phah jurip ïa baroh ki transformer, ki nar pynpar bor ding ilektrik bad ïa kiwei kiwei ki bynta ba ïadei bad ka bording hapoh South West Khasi Hills District bad Mawsynram Block bad ba ka ophis ka dei ban maramot ïaki bynta ba dei ban maramot bad ban pyn tikna ba baroh ki transformer ladei ban phah ker noh mardor khnang ba kiba kum kine kiei kiei kin nym jia shuh nangne shakhmat.

Kumban shu pynkynmaw ba dei ha ka 21 tarik Ïaiong 2022, ha kaba ine i heprit i la shah bat bording kaba la pynlong ruh ba in mynsaw jur haduh ba in duh ei la ki dkhot met ba kynthup ïa baroh ar tylli ka kti jong i.