Shillong:Ka tnat shna surok jong ka jylla Meghalaya ka la shna ïa ka jaka ïeng kali ha Mylliem Khatar-mer harud Wah Umtyngar khnang ba ki nongleit nongwan khamtam ïa kiba wan kai sngew bha kin ïoh ban pynïeng ïa ki kali ha katei ka jaka
Hynrei, katkum ka jingïohi ha katei ka jaka ka la pynlyngngoh ïa ki nongleit nongwan ha kaba la ïohi ba ïa katei ka jaka ïeng kali kaba don harud ka wah jingkieng Umtyngar la khang da kaba buh ïa ki jingker ban nym shah ïa ki kali ban rung shapoh.
Katkum ka jingïathuh jong ki briew kiba sah sha katei ka jaka ki bym kwah ïathuh kyrteng, haba ïadei bad katei ka jingkhang noh ïa katei ka jaka pynïeng kali kaba la buh kyrpang ïa ki nongleit sha katei ka jaka, ki la ïathuh ba ka daw ba kongsan eh halor ka jingkhang noh ïa katei ka jaka ka long na ka daw ka jingleh kulmar jong katto katne ngut ki nongwankai.
Na ka liang jong ka shnong kaba peit ïa katei ka jaka ba kan nym don kano kano ka jingleh klumar da kiba wan kai hynrei ïa ka jingmana jong ka shnong ym don ba sngap ha kaba ki briew ki la pynïeng kali wat haduh shiteng synñia ha katei ka jaka, kaba lah wanrah ruh ïa ka jingsuba sniew bad bym shngaiñ ha katei ka jaka ne wat ïa ka shnong hi baroh kawei.
Khlem da kwah ban pynpaw kyrteng, na ka liang ki rangbah ki la pynsngew ba kim don lad shuh da kumwei hynrei ki la ong ba la hap ban shu khang noh ïa katei ka jaka ïeng kali kaba I tynnad kaba la shna da ka tnat shna surok ban khanglad ïa ki kam bym sngew tynnad ha katei ka jaka bad kiwei pat ki jingjia na ka bynta ka bha ka miat jong ki nongshong shnong.
Ka bha👍