Ba leh khlem akor palat u bar jylla, hiar ki HNYF ban leit khang ia ka jaka tylliat maw ha Bara Killing

Nongpoh: Ki nongialam ha ryngkat ki dkhot ka Hynniewtrep National Youth Front (HNYF) Northern Region, hynnin ka sngi ki la hiar sha ka shnong Bara Killing, ban leit khang ia kawei ka jaka tylliat maw (Crusher) kaba don ha katei ka shnong, kata hadien ba ki la ioh shibun ka jingujor na ki longkmie longkpa jong katei ka shnong, kiba la ujor sha ka seng halor ka jingkynnoh ba katei ka jaka tylliat maw, ka la pynmih tdem palat bad kaba la wanrah jingeh ia ki paidbah ha katei ka shnong.

Haba leit ban khang ia katei ka jaka tylliat maw, la ialam da u Bah Marcus Marten, President ka HNYF, ha ryngkat ki dkhot ka seng lem bad ki katto katne ngut ki longkmie longkpa na katei ka shnong, ha kaba mar ia poi ha katei ka jaka ba don katei ka karkhana tylliat maw, kaba dei ka jong u Santu Agarwal, ki la shu phah khang beit mardor.

Ki briew na katei ka shnong, ki la pynpaw ba naduh ki por ba kham mynshwa, la bunsien ki la leit ban kyrpad ia ki briew kiba peit ia katei ka jaka tylliat maw, ba kii dei ban theh um ha ka por ba ki tylliat maw, namar ba ka dei ka jaka kaba don hajan ka shnong, khnang ban duna ka jingmih pum pum, hynrei la kynnoh ba utei u trai um ju patiaw satia, kaba la pynlong ia ki paidbah hapoh katei ka shnong ba kin hap bam pum pum lynter bad dei halor kata ka nongrim, kaba la pynlong ia ki riew paidbah jong katei ka shnong, ba kin pan jingiarap noh na ka HNYF.

Shwa ban leit khang ia katei ka jaka tylliat maw, u Bah Marcus Marten, nyngkong u la iakren bad wad jingtip shwa na ki riew paidbah jong katei ka shnong, hadien kata pat ki la leit ban jurip ia katei ka jaka tylliat maw, hynrei haba ki la lap ia ka jingshisha ba ka jingpynmih da katei jaka tylliat maw, ka la pynlong ia ka seng bad kin khang noh shisyndon ia katei ka jaka tylliat maw.

Ka seng ka pynrem jur halor katei ka jingleh khlem akor da utei u bar jylla, u bym shym la pyrkhat shuh ia ka jingjynjar ki paidbah. Namarkata na ka liang ka seng kam ailad ia katei ka jaka tyllait maw ba kan pyntrei katba kam pat lah ban pynbiang ia ka jingdonkam ki paidbah bad khamtam eh ban pynduh noh ia ka jingpynmih pump um ha ka por ba ki pyntreikam ia katei ka jaka tylliat maw.