Ba leh-heh bad ym burom ia kiba rit, dawa ka FKJGP ba pynkynriah kam noh ia u bar jylla uba la long kum BMC SSA Umling Block

Nongpoh, 30 Nailar: Ki nongialam ka Federation of Khasi Jaintia & Garo People (FKJGP) Ri Bhoi, mynta ka sngi, ki la leit ban kynduh ia u P.P Yadav, uba long kum u Block Mission Coordinator (BMC) ka Samagra Shiksha Abhiyan ha Umling Block Resource Centre, kata ka dei hadien ba ki la ioh jingtip ba utei u ophisar, u ju byrngem bad kren ruh da ki kyntien bym dei ban kren ia ki nongtrei hapoh katei ka ophis BMC kaba don ha Nongpoh.
Katei ka jingleit kynduh da kitei ki nongialam ka FKJGP, la ialam da u Bah Shanlang Diengdoh, General Secretary bad u Bah Gabriel Sun, Education Secretary ka FKJGP ha Ri Bhoi, ha kaba katei ka jingleit kynduh jong ki ia utei u BMC, ka dei hadien ba ki la ioh ia shibun ki jingujor na ki nongtrei hapoh katei ka ophis treikam bad ruh na ki nonghikai SSA, kiba ju leit ban pan jingiarap na katei ka ophis jong ka BMC.
U Bah Shanlang Diengdoh, haba kren sha ki lad pathai khubor, u la iathuh ba ha ka jingkren bad u P.P Yadav, ki la ioh ban kren halor shibun ki mat bad kata ka long naduh ka jingujor kaba ki la ioh ia ki nongtrei hapoh katei ka ophis bad kumjuh halor ka jingujor kaba ki la ioh, ba utei u BMC, u ju shim pisa na ki nongpyniaid ha ki skul, haba ki kwah ban ioh ia kino kino ki kam pynroi hapoh ka skul, kaba kynthup naduh ki kam ba pynhep ia ki kam klass, ki jaka leit shabar lem bad kiwei.
“Ha ka jingiakren jongngi ka seng lem bad u P.P Yadav, ngi la lah ruh ia u ba u dei ban panmab ia kawei na ki nongtrei hapoh katei ka tnat, kaba katei ka longkmie, ka la shah kren tohmet eh ha utei u P.P Yadav, ha kaba ynda ngi la iakren, u la panmab bad uba la panmab syndon lyngba ka jingthoh, ia kaba u la phah sha katei ka longkmie” ong utei u nongialam ka FKJGP.
Namarkata, watla katei ka jingiakren ka la long kaba iaid beit iaid ryntih, hynrei kum ka seng kam kwah shuh ba utei u P.P Yadav ba un don ha Ri Bhoi, namar katkum ka ba ka seng ka la ioh jingtip, ba utei u briew, u dei uba la shah beh beit na kat ki jaka ba u trei, namar ki kam kiba u trei ki dei kiba ym sngew iahap ia kiba bun.
Haba iadei bad utei u P.P Yadav, ka seng ka kwah ba un mih noh na Ri Bhoi bad ha ka jaka jong u la dei ban thung noh da kiwei pat kiba lah ban trei ia katei ka kam bad halor katei ka kam, na ka liang ka seng kan sa kynduh ia ki bor ha kham haneng, na ka bynta ban dawa ba utei u ophisar ba weng noh syndon na na Ri Bhoi.