Shillong: Ki saw seng kiba kynthup ia ka Khasi Student Union (KSU), Federation of Khasi Jaintia and Garo People (FKJGP), Ri-Bhoi Youth Front (RBYF) bad ka Hynniew trep National Youth Front (HNYF) mynta ka sngi ki la pynlong iaka jingialang ha ka ophis u Syiem ka Hima Sohra ha Maraika phon ha ka jing ia don ryngkat lang u Syiem ka Hima Sohra u Paiem Freeman Sing Syiem ki khlieh nongsynshar shnong, ki nongialam Shnong bad ka kynhun ki nongkhaii na ka bynta ban pyrkhat halor ka rukom ban beh noh ia ki bar jylla na katei ka thain.
Haba kren bad ki lad pathai khubor u president ka KSU u Lambokstarwell Marngar u la iathuh ba ha ka jing ia lang ka la don kawei ka sur ban thaw noh da kawei ka kynhun synroplang jong ki sengbhalang bad ki khlieh nongsynshar shnong, kynhun ki nongkhaii, ki nongialam Shnong lem bad ka ophis u Syiem ka Hima Sohra na ka bynta ban puson bha kumno ban beh noh ia ki bar jylla na kane ka thain khlem da poi sha ka jing ia umsnam.
“Ka ‘House’ ka la mynjur ban thaw noh da kawei ka khynhun synroplang ha ka jing ia don lang jong ki sordar, ki rangbah shnong, kynhun ki nongkhaii, u syiem bad ki sengbhalang na ka bynta ban wad da ki lad katkum ka ain na ka bynta ban beh noh ia ki bar jylla na kane ka thain” u la bynrap.
U president ka KSU u Lambokstarwell Marngar u la ong ba ka jing beh noh ia ki bar jylla kam dei da ka jing ia umsnam, hynrei da ka ba knieh noh ia ka khaii pateng na ki da ka ba weng noh ‘Cancel’ noh ia ki NOC bad ki ‘trading licence’ jong ki bar jylla na kane ka thain bad na ka jylla Meghalaya hi baroh kawei. U Lambokstarwell Marngar u la pynrem jur bad maham tyngeh ia ki Khasi ba leh ‘Benamai’ ha ka thain Ichamati, Majai, Shella bad kiwei de namar ka jing leh ‘Benami’ ka la pynlong ia ki bar jylla ban juh bha sha kitei ki shnong khamtam namar ba ka hap khappud bad ka ri Bangladesh.
Na ka liang u Syiem ka Hima Sohra u Paiem Freeman Sing Syiem u la iathuh ba ka jing ai NOC ka ophis jong u kadei bad ia ki Khasi tangba don pat ki Khasi mar sien ioh NOC ki la ain oh pat sha ki bar jylla. U Paiem Freeman Sing Syiem u la ong ruh ba naduh mynta ka ophis jong u kan nym ai NOC shuh sha ki bar jylla bad un da bishar bniah bha haba dei bad ka jing ai NOC sha ki Khasi hapoh ka thain.
U president ka FKJGP u Wilbert Rani u la kyntu ia ki khlieh nongsynshar shnong bad ki nongialam Shnong ba kim dei ban ai NOC shuh sha ki bar jylla bad ki dei ban pynkhreh ia ki kyrteng jong ki Khasi ki ba leh ‘Benami’ khnang ba ka ain ‘ Benami Act’ kan ioh ban pynshitom ia ki. U la ong ruh ba ka jingiakhun pyrshah ki bar jylla kadei ban long da kaba jai jai da kaba kdiah ia u budlum jong ki bar jylla, kata da ka ba knieh noh ia ka khaii pateng da kaba pyrkhing ia ki lyngba ka ain.Na ka liang K W Nongrum u ba dei ruh u Joint Secretary ka Meghalaya Limestone, Boulder stone and Coal Miner Cum Exporter Forum u la kyntu ia baroh ki nong khaii mawshun ba kim dei shuh ban ia dei kam bad ki bar jylla bad kidei ban ia die ia thied mawshun ne mar khyndew tang para Khasi hi, bad suki suki ki bar jylla kin sa phet hi na kane ka thain bad na ka jylla Meghalaya.
Phi don ban ong eiei?