Ba leh bein ka sorkar, hap iaid 5 kynta sha Mawpud, ong HNYF

Shillong, 08 Nailar:
Ka HNYF bad ka Saw Shnong Development Council” (SSDC) Mawpud Area ka la lap ba ka surok na Umpung sha duh Mawpud ka South West Khasi Hills kaba don tang 13 KM ka jingjngai hynrei la hap ban iaid haduh ar kynta tam da ka kali ban poi ha ki shnong ka thain Mawpud ka ba don 4 tylli ki shnong kata Upar Mawpud, Lower Mawpud, Dom Mawlein, bad Pyn-denwar.
Ha ka jingpynlait khubor mynta ka sngi, u Vice President ka HNYF u Bah KS Rani u la ong ki briew katei ka thain ki im da ka rep ban ioh ka bam ka dih, ban phah Skul khun, bad lada wan ki jingeh haka pang ka shitom ki ju sha niah beit na ki jingmih na ka rep kum ka rep kwai, tympew, sohmrit, synsar, Sohniamtra bad kiwei kiwei.
Hynrei ka jingsniew tasam ka surok ka wanrah jingeh shibun ia ki ha kaba ka surok kaba jngai tang 13 km hap ban iaid da ka kali haduh ar kynta. Lada kaba bha kan shim por tang 20 ne 30 minit eiei.
Ha ka jingleit jurip ka HNYF bad ka “Saw Shnong Divilopment Council” (SSDC ) la don lang u Bah Dmanson Thongny Morbah kum u president u ba long u Rangbah Shnong ka Pyndenwar bad kiwei de ki nongialam shnong.
Ki nongkren ha kane ka jingjurip ha ka sngi Saitjain ki la pynpaw ia ka jingsngew diaw halor ka jingieh noh bein ka Sorkar bad ki nongmihkhmat ia katei ka surok PWD ka ba la rim bha hapoh ka jylla ba la pyntrei naduh u Snem 1971.
Kane surok ka hap hapoh ka jing peit u Executive Engineer (EE) ka Ranikor Division, Superintendent Engineer (SE) West Khasi Hills.
U bah Dmanson Thongny Morbah u la ia thuh ba kane surok la shna naduh ka por ka Sorkar Assam snem 1971 bad mynta ka la dap 45 snem, hynrei ka Sorkar bad ki nongmihkhmat kim shym la shim khia ei ei ruh iaka jingdonkam ki paitbah ki saw shnong Mawpud Area bad wat ia ka tender bala khot ban siang rong katto katne kilometer ruh la shah rah noh shawei pat ha u MLA bah MM Danggo.
Ka Saw shnong Divilopment Council ka kyntu iaka Sorkar, lyngba u MLA ka Ranikor ba kin shim khia lem ban pynioh surok rong noh.
Katba u bah K.K Wanniang u ong ha ka jingshisha ka la jan ban leit sha Mawkyrwat lyngba ka surok PMGSY bala bteng naka surok PWD sha shnong Bamon shaduh Mawkyrwat hynrei dang sah teng sa 2 km ban iakynduh lang.
Katba u bah Rani u la ong ba u MLA u dei ban shim khia ia kane ban pynioh surok rong iaka thain kum u MLA bala jan dap 20 snem ka jingmihkhmat . Namar ka jingsniew ka surok la iakynduh jingeh ki paitbah haba pang ba shitom ban leit shim dawai bad don ruh ki ba shitom nalor ban pynpoi ia ki mar rep bad ban wanrah ia ki bam mar dih.