Ba kyrshan ka BJP, kyrmen ban jop ka NPP, ong u bah Prestone

Shillong:U Symbud Myntri Rangbah ka jylla bad u President ka NPP Meghalaya u Bah Prestone Tyn song ula ong, ba ka NPP ka pdiang sngewbha ïa ka jingshim rai ka BJP ban ai jingkyrshan ïa ka NPP ha ka ilekshon MP Lok Sabha ha ka jylla Meghalaya.

“Ka seng NPP ka pdiang sngewbha ïa ka jingrai ki nongïalam kiba hakhlieh jong ka BJP na Delhi ban ai jingkyrshan ïa ki arngut ki kyrtong ka NPP na Tura bad Shillong kiba ïakhun ïa ka ilekshon MP. Ngam poi pyrkhat, hynrei ngi sngewtynnad shibun bad ngi ïoh mynsiem bad ngi sngew donbok ïa kane ka rai kaba ki heh duh ka BJP kila shim ba ki kyrshan ïa ki kyrtong jong ngi,” ong u Bah Prestone Tynsong.
Ula ong ruh ba ka jingwan ai jingkyrshan ka BJP ïa ka NPP kan long ka jingmyntoi namar ka Vote jong ka BJP kan wan noh sha ki kyrtong jong ka NPP.

“Ha ka jingpeit hi ka jong ngi, kan long ka jingmyntoi namar ka Vote ka BJP ha Shillong Constituency la kumno kumno ruh ka ju ïoh 70,000 ne poi haduh shi lak, te mynta kane ka vote ha ka jaka ba kan leit sha kiwei ne ba kan neh beit ha ka BJP kan leit noh sha ki kyrtong ka NPP bad kane kan dang ïarap shuh shuh ia ka NPP,” ong u Bah Prestone.

Ula ïathuh, ba shen ki nongïalam ka NPP bad ka BJP kin sa ïakynduh bad kin shong jingïalang na ka bynta ban pynïaid shakhmat ïa ki kam kiba ïadei bad ka ilekshon MP ha Shillong bad Tura Constituency.