Shillong: Ka Khasi Students Union (KSU) Delhi unit, ka la phah ia ka jing ujor sha U Conrad K Sangma, myntri rangbah ka Jylla, ban iathuh ia ka jingshah khang lad jong kawei ka samla, kaba shah leh tohmet, ba kan leit sah ha Meghalaya House, New Delhi.
La iathuh ba katei ka dei ka samla kynthei, kaba 26 snem, kaba dei na ka Jylla Meghalaya, kaba la shah leh niewbein ha u nong ai kam jongka ha Gurugram, Haryana, ha kaba ka la ujor ha ka 3tarik Jymmang 2020.
Ki pulit jong ka Haryaya ha ryngkat bad ka NEAT, ki la leit ialam ia katei ka samla ha Meghalaya House, Abdul Kalam Road bad hadien sa ha Meghalaya House, Vasant Vihar ha ka 4tarik Jymmang 2020.
Hynrei ha baroh ar tylli kitei ki iing, la shu pynap sah da ki bun kynta ia katei ka samla bad ym don ba mih satia, naduh U Resident Commissioner lane na ka liang ki nongtrei, ban iathuh ba kin nym shah ba kan leit sah ha katei ka iing. Ia katei ka samla, ym shym la ai jaka sah satia, hynrei la phah ba kan leit sha ka Quarantine Center, wat hadien ba ka KSU, ka la iathuh ba kam dei satia kaba pang Covid, hynrei ka dei kaba la shah leh niewbein ha Haryana
La ong shuh shuh ba kane kam dei satia ka sien kaba nyngkong, kaba la jia ha Meghalaya House, New Delhi bad kiba ka KSU, ka la ju ujor sha ka ophis jong u myntri rangbah ka Jylla.
Ka Union, ka dawa namarkata ba dei ban pynshitom ia kito kiba donkti ban leh niewbein ia katei ka khynnah samla bad la dawa ruh ban pynthikna ba ym dei ban niewbein ia kito kiba sah kut lynti shabar jong ka Jylla bad ban ailad ia kitei kiba shem lanot ba kin ioh ban pyndonkam ia ki Meghalaya House, kiba don ha ki nongbah bapher, ong ka khubor ba la soi da ka kong Marbiang Khongwir, President lem bad kiwei de ki dkhot jong katei ka seng.
Phi don ban ong eiei?