Ba kynnoh U Bah JA Lyngdoh “Ba iakhun elekshon, tang ban ioh pisa”

Shillong, 15 Jymmang:
U bah Tony Marbaniang, 25 snem karta u la ujor da ka ejahar pyrshah ia u bah John Anthony Lyngdoh Vice President ka BJP bad u la kynnoh ba u bah J.A Lyngdoh ( bah Dip) u la kren pynkhlemraiñ ia u bad ba u la pynjah burom ha kawei na ki jingialang jong ka BJP ha ka 14 tarik mynta u bnai ha Oakland Communitty Hall, Bivar Road ha ka por 5 baje haduh 7 baje mynmiet. U bah Tony u la leit ban ujor ia katei ka ejahar sha Sadar Police Station.
Haba ia kren bad ki nongthohkhubor u bah Tony u la ong ba u don ki sakhi satar kiba biang lyngba ka Video ba u bah Dip u la kren ha katei ka jingialang da kaba ong ba u (Tony) u ia khun elekshon tang ban ioh pisa bad lada jia ba phah shongnoh ia u bad yn ai da ka pisa un sa shongkhop bad un ym ia khun shuh ha u 2018. Shuh shuh u la ong ba u bah Dip u la ong ba u (Tony) um dei satia u dkhot ba pura ka BJP, hynrei ia kane ruh u la ong ba u don ki sakhi bad ki kot ki sla ban pyni ba u dei u dkhot ba pura jong ka BJP.
Ha kaba ia dei bad katei ka kam u bah Tony u la ong ba um shym la ujor satia sha ki heh nongialam jong ka seng BJP naba u bah J.A Lyngdoh ( bah Dip) u la dei lypa u nongialam ba hakhmat ka BJP (Vice President) bad kam don jingmut shuh ia u ban leit ujor sha ka Party.
Kumta u la ong ba kum ka dak ka jingpyrshah ia katei ka jingkren kaba ktah ia ka long rynieng jong u, u bah Tony u la ong ba ha kine ki shisngi ar sngi un leit ban shong kyraiñ hakhmat ophis ka BJP, “Kam dei ka jingshong shah thngan , ngan bam ngan dih hi tangba nga kwah ban pynpoi ia ka sur jong nga sha ki nongialam ka BJP ha Delhi lyngba ki lad pathai khubor” ong u bah Tony haba kren hakhmat Sadar Police Station.
Shuh shuh u la dawa ba u bah Dip u dei ban pynshai paidbah ryngkat ki sakhi satar halor ka jingkynnoh jong u (kumba u la kren ha ka Video) bad lada jia ba um lah ban pynshai paidbah ruh, u dei ban pan map ha ka jingialang paidbah ha North Shillong konstitwensi.
Lah ban kdew ba khyndiat sngi mynshuwa u bah Tony uba shong basah ha Police Reserve u la pynbna paidbah ban ia khun ha ka elekshon 2018 bad ban pan tiket na ka seng BJP bad lada jia ba ka BJP kam ai tiket ruh u la rai ba un ia khun kum u kyrtong shimet.
Lah ruh ban kdew ba u bah J.A Lyngdoh u MLA barim ka Mawphlang bad u myntri barim ka sorkar jylla u la phet noh na ka seng UDP ban leit ia soh BJP da ka jingmut ban ia khun na ka BJP ha u 2018 na North Shillong konstitwensi bad ka BJP ka la pdiang sngewbha ia u da kaba ai ia ka kyrdan Vice President.