Ba kynnoh hukum siat iap U MR, ia ki ANVC-B Pan bor ki CID na kashari ban pynshitom ia ki nongialam

Shillong,1Nailur:
Kat kum ki khubor kiba la mih ha ki kot khubor ha ka 21 tarik u nailar 2014, kaba la kyn noh ba u Myntri Rangbah ka jylla, u Dr.Mukul Sangma u la hukum ia ki pulit ban siat ia ki dkhot ka ANVC-B ha kano kano ka por ba ki iohi ia ki, kaba dei ruh ka khubor ba la pyllait paidbah da u Political Secretary ka ANVC-B u Doang Shira uba la kynnoh ba u Myntri Rangbah u la pynmih poh rieh ia katei ka hukum pyrshah ia ki dkhot jong ka. Katkum ka kyrwoh ba la phah da u Public Relation Officer ka tnad pulit u la ong ba katei ka jingkynnoh ka ANVC-B ka dei ka bym don nongrim, hynrei ka dei tang ka jingthmu ban ialam bakla ia ki paidbah bad kaba thew ruh ban wohdong ia ki pulit. Halor katei ka jingthoh kaba la phah da u Political Secretary ka ANVC-B ha ka 1 tarik u nailur , ka tnad State CID ka la phah da ka jingthoh sha u Chief Judicial Magistrate, Shillong bad ka la pyntip sha u ba ka tnad pulit borabor ka long kaba trei katkum ki ain ba la pynkupbor ha ka bad kam ailad ba ka tnad jong ka kan shah ialam bakla ha ki kam be-ain ha kino kino ki bor bahalor.Ka tnad pulit ka la kynnoh ba katei ka jingpyllait khubor ka ANVC (B) ka long tang ban wanrah ka jingtieng jingsmiej ha ka jingmut jingpyrkhat ki paidbah.
Ka tnad pulit ka la pan bor ruh na u Chief Judicial Magistrate ba un aibor ba ka tnad pulit kan tohkit kham bniah ia katei ka jingpyllait khubor ka ANVC-B. Ki pulit ki la kynnoh ruh ba katei ka jingthoh jong u Political Secretary ka dei kaba u la thoh katkum ka hukum jong u Chairman jong ka u Bernard N Marak uba ki ju sin u Rimpu Marak , ki la kam ba katei ka jingthoh ka dei kaa pynkhein ia ka ain Section 505. IPC kaba ong “ ka jingthoh kaba wanrah jingsngewthuh bakla sha u paidbah, kaba ong ruh ba uno uno uba pynmih lane pynsaphriang ia ki jingthoh lane ki hamsaia …….da ka jingmut ban wanrah jingshong syier sha u paidbah, ka long be-ain kaba ka jingpynshitom ia kum kita ki briew ka long 3 snem hapoh phatok khlem ioh jamin.
Ka tnad pulit ka la pyntip ruh ba hadien ba la ioh hukum na ka kashari u Chief Judicial Magistrate, ka tnad CID kan pynshitom bad pynngat ha ki kyndon ain ia u Chairman ka ANVC (B) u Rimpu Marak bad u Political Secretary u Doang Shira, ong ka kyrwoh na u PRO ka tnad pulit.