Nongpoh: Ki nongialam ka HANM, Byrnihat, ki la dawa na ka sorkar ba ka dei ban buh noh ia kawei ka jaka bret niut kaba biang ha Byrnihat, kata hadien ba ki la leit ban jurip bad lap ba kawei ka jaka kaba don harud surokbah NH-6 ha Borbhuin Byrnihat, ka la kylla long kum ka jaka bret niut, namar bym don ki jaka bret niut kaba biang ha katei ka thain.
Haba iadei bad katei ka jingdawa ban don noh kawei ka jaka bret niut kaba biang ha ka thain Byrnihat, u Samla Ajit Makri, President ka HANM Byrnihat, u la ong ba ka la long shisha ka jinglehrain kaba khraw ban iohi ba kawei kaba don harud ka surok ha Byrnihat, ka la kylla long kum ka jaka bret niut bad kaba la wanrah ia ka jingsma iwtung kaba shyrkhei bad kaba la ktah ia ka koit ka khiah ki paidbah ha katei ka jaka bad kumjuh ruh ia ki nongleit nongwan lyngba katei ka surok.
Haba batai halor katei ka jaka, kaba la pynlong kum ka jaka bret niut, utei u nongialam ka HANM, u la ong ba tang namar ka jingbymdon ka jaka bret niut ba biang ha katei ka thain, ka la pynlong ia ki paidbah ba kin pynlong ia katei ka jaka kum ka jaka ban bret ia ki niut ki nier.
Shuh shuh, u la ong ruh ba hapoh katei ka jaka, la leit ban bret niut da kiba nongshong shnong ka thain Byrnihat bad wat ki briew kiba don sha ka liang ka Assam ruh kumjuh.
Namarkata, na ka bynta ban wanrah ia ka khuid ka suba hapoh ka thain Byrnihat hi baroh kawei bad ruh ban weng noh ia ka jingbret jaboh ha katei ka jaka, na ka liang ka seng ka kyntu jur ia ki bor ba deipeit ba ki dei ban pynkhuid noh ia ki jaboh kiba don ha katei ka jaka bad ruh ki dei ban wanrah noh ia kawei ka jaka bret niut kaba biang ha ka thain Byrnihat, khnang ba kan long ka jingmyntoi ia ki paidbah kiba don ha katei ka thain hi baroh kawei, u la bynrap.
Phi don ban ong eiei?