Ba kwah ioh khun bun u heh ka AIUDF, ong U Swamy “Hato ula ju kylli, la ki tnga jongu, ki mynjur ne em?”

U Subramaniam Swamy, u nongialam ka seng BJP, ula ther tyngeh mynta ka sngi, ia u nongialam jong ka seng AIUDF, U Badruddin Ajmal, namar ba u pyrshah halor ka ain jong ka sorkar Assam ban don khun arngut.

Halor katei ka phang, U Swamy, ula kylli ia U Ajmal, uba dei u nongialam jong ka seng All India United Democratic Front (AIUDF), la ula ju kylli ne em ia ka tnga jongu, la ka kwah ne em ban ioh khun 7-8ngut, kumba u kwah ma u.

U Swamy, ula ong “Hato U Ajmal, u ju kylli na ka tnga jongu lane na ki tnga jongu, la ki iahap ne em ban kha khun 7-8ngut na kawei kawei ka kmie?”. “Dei ban kylli na ki kynthei ruh, namar ki dei kiba kit shitom haduh khyndai bnai” ong U Swamy.
Na ka liang ka sorkar Assam, ka la rai ba naduh ka 1tarik Kyllalyngkot 2021, kan nym ai kam shuh ia kito kiba don khun palat arngut.
Hynnin ka sngi, U Badruddin Ajmal, u ong ba ki Muslim, kin nym sngap satia ia katei ka hukum jong ka sorkar Assam.
“Ki Muslim, kin kha khun shibun shibun, kin nym sngap iano iano ruh. Mynta ka sorkar Assam, ka wan rah ia kane ka ain, ban khanglad ia ki Muslim, ba kin ioh kam. Ka Sachar Committee, ka kam ba ki don tang 2 percent ki Muslim, kiba ioh kam sorkar. Ki la bun mynta kiba nang ba stad na ki long iing Muslim bad kitei ki trei ha kylleng ka pyrthei” ong U Ajmal.
La ong biang U Ajmal “Ka niam jongngi bad nga ruh nga sngew ba kito kiba kwah ban wan sha pyrthei, ki dei ban wan bad ym dei ban pynsangeh ia ki”.