Ba kwah heh bainong; byrngem sa ki nongshet ja, ban thiah surok

Shillong:Ki longkmie nongshet ja sngi ha ki skul bapher bapher, ia kiba la tip kum ka kynhun Meghalaya Mid Day Meal Workers Union, myn ha ka sngi Palei ka 11 tarik u Nailar 2022, ki la dawa na ka sorkar jylla, ban kyntiew bainong sngi noh sha ka 3000 kaba dei ban siew 12 bnai na kaba ju siew baroh shi katta 1000 tyngka, tang na bynta 10 bnai ha ka shi snem.

Katei ka kyn hun kaba la lam khmat da ka President ka kong Billin Kurbah, haba kren sha ki lad pathai khubor, ka la ong ba ka kynhun, kan ai por ia ka sorkar, tang ha une u bnai Nailar ba mynta ba lada kam shem la shimkhia ia ka mat jingdawa kaba la buh ha khmat ban kyntiew bai nong sha ka 3000 baroh 12 bnai, ki la byrngem ban ia khun pyrshah ia ka sorkar wat ban poi ha u pud ban mih surok ne ban thiah surok kim salia.

Ka kong Kurbah, ka pynpaw, ba ka jingrit ka bainong sngi kaba 1000 tang 10 ha ka shisnem kaba ju siew baroh shi katta bad ka pynpaw ia ka jingsngew sih kthang kaba jur ia ka jingleh bein jong ka sorkar MDA, kaba la ialam da u Myntri rangbah ka jylla u Conrad Sangma, namar la bun tylli ki snem, ki la iai khmih lynti ba lano ka sorkar kan kyntiew bainong, hynrei ki shah leh kai pynban bad kim shym la shim ia ka rai jong ki nongshet ja skul.