Ba kwah bun paid ki seng riewlum, iakhun hi u bah Titos

Shillong,10 Rymphang:
Ka sngi thep kyrteng ki kyrtong ki ban ia khun ha kane ka elekshon MDC 2014 ka la kut noh mynta ka sngi ka 10 tarik u rymphang. Bad naduh mynta hi ka sngi ka la sdang sa ka jingpeit bniah ia ki kot ki sla ki kyrtong kiba la dep thep kyrteng. Ha Sohra civil Sub-Division u bah CVD Diengdoh Sub-Divisional Officer ka Sohra Civil Sub-Division u la iathuh ba ki la don haduh 9 ki kyrtong kiba la wan ban thep kyrteng , 9 ngut na Sohra konstitwensi bad 4 ngut na Shella Konstitwensi.
U bah Titos W Chyne u kyrtong ka UDP na Sohra bad u bah Bantyngshain Rynga, u kyrtong shimet na Shella konstitwensi ki dei ki ar ngut ki kyrtong kiba la wan ban thep kyrteng khadduh eh ha Sohra Sub-Division. Kitei baroh ar ngut ki la pyndep syndon ia ka scrutiny mynta hi ka sngi. Haba ia kren bad ki nongthohkhubor u bah Titos u la ong ba ka thong kaba u la mih biang sa shisien ban ia khun hi dalade ha kane ka elekshon MDc 2014 ka dei namarba u kwah ba ka seng riewlum kan ioh bun paid bad kan bat ia ka bor synshar ha KHADC, u la ong ba kumba ka long mynta ka sorkar Congress kam peit ia ki jingeh jong ki trai jylla kiba ia kynduh man la ka por halor ka jingwan rung khyrthlep ki mynder ri sha kane ka jylla ka jingshah klun ki khyndew ki shyiap ha ki shipai ne ban shim khia ia ka jingpynbeit ia u pud u sam ha ka jylla kaba la ktah shisha ia ki trai muluk. Shuh shuh u la ong ba lyngba ka KHADC ka lah ruh ban wanrah ia biang ia ki riti dustur kaba khlain bad ban ai bor ia ki Hima ban pynkhlain ha ka synshar khadar ha ka bor synshar.
“Kum ka jingpynlong ia ka Monolith Festival kadei ka nyngkong ha ri khasi ban pynbna sha ka pyrthei ia ka jingriewspah jong ki khasi ha ki riti dustur. Lada ki party riewlum ki ioh ban wan ha ka bor synshar ha District Council kin wan rah ruh ia ka motion ka khasi protection Area permit” ong u bah Titos MLA /MDC ka Sohra.
Haba ia kren bad ki nongthohkhubor hadien ba la dep thep kyrteng u bah Bantyngshain Rynga u kyrtong shimet na Shella u la ong ba haduh mynta ka Shella ka dang sahdien bad ka don ha ka jingdum, kumta u la jied ia ka shap jong ka sngi ba un ieng ha kane ka kynti khnang ba ka shap kaba u ieng kan pyni ia ki jingmut ba u don ka jingthmu ban wanrah jingshai noh ha katei ka konstitwensi. U la ong ruh ba lada ki paidbah ki jied ia u kum u MDC ka thong jong u ka dei ban iada ia ka khyndew ka shyiap, ban pynneh ia ka riti ka dustur, ban iada na ka jingwan tuid kyrthep ki mynder sha kane ka jylla kumjuh ruh ban pyrkhing ia ka jingai trading laisen kaba laitlan ia ki bar jylla ba kin seng kam seng jam ha kane ka jylla. U la kren ruh shibun kiei kiei ki jingthmu ba bha jong u ban trei bad ban shakri ia u paidbah ka Shella konstitwensi.