Ba kular ka Majistor, weng shah thngan ki samla wadkam

Shillong,30 Naitung:
Ki samla wadkam ki la weng noh ia ka jingia shong shah thngan jong ki, bad ki la weng noh mynhynnin ka miet ha ka por 11:30 baje. Ka jing weng noh kitei ki samla wadkam ba la pass ia ka eksamin DSC ia ka jing shong shah thngan kaba ki la shong la ar sngi ha Indoor stadium, Jing kieng-Nong thymmai, ka dei hadien ba ka Majistor ka kong R.Wahlang ka la kular lyngba ka jingthoh kaba la thoh da ka kti ba yn pynjlan biang ( Extension) ia ka lad ioh kam jong ki sa hynriew bnai, iathuh ka General Secretary ka Association ka kong PL Thabah.
Ka GS ki samla wadkam ka la iathuh ruh ba hadien ba ki la ioh ka jingkular na ka Majistor ki la leit ban ia kynduh ia u Deputy Commissioner mynta ka sngi, ha kaba u la ong ba ia ka jingthoh yn sa pynpoi sha ka Personal Department. Kitei ki samla wadkam ki la ai khublei ia baroh kiba la kyrshan bad wan jngoh ban ai mynsiem ia ki ha kitei ki kynta kiba la thiah thngan ha katei ka jaka ban dawa ia ka hok jong ki, ki la ai khublei ia u MLA ka Nongthymmai u bah Jemino Mawthoh, u pastor Pyrtuh, bad kiwei pat kiba la ai mynsiem ia ki.