“Ba kren pohdor ia ki thei Khasi, dei ban pan map ka Delhi Club

Shillong, 27 Jylliew:
Ka jingjia ia ka kong Kong Tailin Lyngdoh na ka shnong Langtor jong ka Mairang Civil Sub Division, West Khasi Hills District, Meghalaya ha Delhi Golf Club, ka dei ka kam thombor bad ka kam pynjah burom kaba palat liam haduh katta katta , ong U Pastor PBM Basaiawmoit, haba pynmih khubor mynta ka sngi.
U Ajit Pal, Manager bad ka Sumita Thakur lem bad ki dkhot jong ka Club hi baroh kawei, ki dei ban pan map paidbah bad ban ia kynduh ia ka kong Tailin Lyngdoh bad ka Dr.(Ms.) Nivedita, namar ba ka dei ka jing pyn poh dor, ia ka riam jong ki kynthei Khasi, kiba khein jait na ka kynthei, ong shuh U Pastor PBM Basaiawmoit.
U Mukul Sangma myntri rangbah ka Jylla, ula kren pyrshah mynta ka sngi, halor ka jingshah beh jong ka kynthei Khasi ha ka 25tarik mynta u bnai na Delhi Golf Club, ha kaba u shim, ba ka dei ka jingleh pyniapher jaitbynriew. U Sangma, u ong ba ula kren ia U Kiren Rijiju, myntri khynnah ka tnat kam poh iing, ba un shim khia halor kane ka phang bad ba un ujor ejahar halor katei ka jingjia, ba kan nym mih shuh kaba kum kane ka jingleh niewbein nangne shakhmat.
Ha kawei pat ka khubor, la iathuh ba mynta ka sngi, ka Delhi Golf Club, ka la pan map na katei ka longkmie, kaba phong Jainsem bad kaba la shah beh na katei ka jaka, kaba don ka jing ia bam ja sngi ha katei ka Club, ha kaba ki la beh ia ka kong Tailin Lyngdoh bad kumjuh ia ka Nivedita Barthakur, kaba dei kawei na ki nongtrei kam lajong ba paw khmat jong ka sorkar Assam.
Ka shithi, kaba la pynmih da katei ka Club, ka pynshai ruh ba kam shym la bthah satia ia katei ka longkmie, ba kan mih noh na katei ka jaka bad la ong shuh ba la pan map na ka Borthakur, ha kaba ka la mynjur ia katei ka jingpan map jong ka Club.
Ka jingshah beh jong ka kong Tailin Lyngdoh, hynnin ka sngi, ka dei namar ba ka phong jainsem, ha kaba ki dkhot jong ka Delhi Golf Club, ki shim, ba ka dei ka riam jong ki shakri kiba trei iing.