Ba kiewdor u khaw bad ka umphniang tin, byrngem iakhih ka HANM

Shillong: Ki dkhot jong ka Hynniewtrep Achik National Movement (HANM), mynta ka sngi ki la leit ban ia kynduh ia ka kong Isawanda Laloo, Deputy Commissioner ka East Khasi Hills District, ban iakren halor ka jingkiew dor kynsan ki marbam mardih ha ka nongbah Shillong.

Haba kren ha ki lad pathai khubor, ha dien ka jingiakynduh ia ka Deputy Commissioner, u Bah L Kharbani, President ka HANM u la iathuh ba ka jingleit iakynduh jong ki bad ka DC ka long halor ka jingkiew dor palat ki marbam ha kine ki sngi ha iew ha hat bad ha kane ka jingiakynduh na ka liang jong ka seng ka la kren shai ba lada ym lah ban leh ei ei ban pynhiar hapoh shi taiew, ka seng kan pynlong da ka jingiakhih. U la ong ruh ba ha ki bnai kiba la dep haba leit ban thied umphniang tin dang dei ha ka dor T.1950/- tyngka katba mynin ka sngi pat ka poi haduh T.2200/-, u khaw Arham ba 50 kilo ha kine ki bnai kiba la dep, haba leit ban thied T.1700/- katba mynnin u poi T.1800/-.

Kane ka jingwan ia kynduh kum ka seng ia ka Deputy Commissioner, ban kyntu ba ki bor ba dei peit ka dei ban leh ei ei, ha kaba ia dei bad kane ka jingkiew dor kynsan ki marbam mardih bad lada ka DC kam lah ban leh ei ei, hapoh kane shitaiew kum ka seng kam banse ban shim hi ia ka ain ha la ka kti ban leit khynra hi ban wad ia ka daw balei ka kiew dor.

“Ka jingkiew dor palat ki marbam mardih kaba man ka por bad kane kan ktah ia ki paidbah, khamtam ia kito kiba bylla mynstep bad thied bam mynmiet, ka don ka jingkiew dor hynrei kamdei ban kiew dor palat da ki spah pat, ka jingkam ba ka don ka elekshon ha West Bengal bad Assam kam don bynta ei ei bad ka jylla Meghalaya ban pynkiew dor ia ki marbam” u la ong. Na ka liang ka seng, ka la shim ia ka rai, ba lada ka sorkar kam lah ban pynhiar dor ia ki marbam mardih, lyngba ka Deputy Commissioner hapoh shitaiew ka seng kan pynlong ia ka jingiakhih bad na ka liang jong seng kan phah ia ki dkhot ban wat jingtip ha kaba ia dei bad ka dor. Ka seng ka la maham ruh ba lada ka lap ba ka jingpynkiew dor ia ki mar bam ka dei tang namar ba kadon ka jingtieng ba ka khlam COVID-19 kan kiew ha kane ka jylla bad ban shim kabu ban pynkiew dor bad ban buh ia ki paidbah ha ka jingeh ka seng kan khang tala ia kum kita ki dukan.

Kum ka seng ka kham shepting ia ka jingiap thngan ki rangli juki, ki duk ki suk ban ia kaba iap COVID-19. Ha kane kane ka jingiakynduh hapdeng ka jingiakren ka Deputy Commissioner ka la phone sha ki Inspector ba kin leit jurip mardor ia ki dukan ha iewduh bad lada lap don kiba shim kabu kin shah pynshitom, katkum ka ain.