Ba kiew palat, ka bai thang ding, leit shong U MLA ha trai dieng

Guwahati:U MLA jong ka parti Congress, u Kamalakhya Dey Purkayastha, ha ka sngi ba ar u la shong ha jan trai dieng ha khmat ka ïingsah jong u lamphang ka ïing dorbar thawaiñ ka jylla Assam,u Biswajit Daimari palat da ki kynta.

U Kamalakhya Dey Purkayastha, u la bud ia ki jingbatai jong u lamphang ka ïingdorbar thawaiñ jong ka jylla Assam,u Biswajit Daimari u ba la ai jingmut, ban shong ha ki trai dieng ban lait na ka jingkiew jong ka bai bording elektrik kum ha kine ki por ba jur bha ka jingshit ka ba la sar ia ka jylla ha kine ki khyndiat sngi.
Haba iakren sha ki lad pathai khubor, u Kamalakhya Dey Purkayastha u la ong ba ka jingkiew jong ka bai bording elektrik ka long na ka 30 sha ka 70 paisa ha ka shi unit. Kane ka dei ka jingeh ba khraw ia ki paidbah nong shong shnong.

Ha ka por ba synshar ka parti Congress ha kiba bun ki jylla ka Congress ka iasaid ban ai ei ia ka bording elektrik, katba ki nongialam jong ka parti BJP kim kren eiei, u la ong.

Kumba u lamphang jong ka ïingdorbar thawaiñ jong ka jylla u la ai jingmut, kum u wei na ki nongmihkhmat jong ki paidbah nga dei ban bud kloi katba lah.Kumta, nga leit sha ka ïingsah jong u bad shong hangtei hapoh ki dieng, da ki kynta, hynrei ngam shem la iohi ia u hangtei.
U Purkayastha u ba bat ruh kum u working president jong ka Assam Pradesh Congress committee (APCC).
Ha shwa jong ka elekshon, ka parti BJP ka la kular sha ki paidbah jong ka jylla Assam ba ka bording elektrik kan ym thud satia ha ki 24 kumta, hynrei kumba long mynta pat ki dang bun kam ban shu pynbiej ia ki paidbah, u la ong.

U MLA jong ka Congress u la shim ia kane ka lynti hadien ba u lamphang jong ka ïingdorbar thawaiñ jong ka jylla Assam, u Biswajit Daimari u la ong ba ka bai bording elektrik ka la kiew bad ki paidbah ki dei ban pynduna ia ka jing pyndonkam ban tyngkai ia ka pisa ban siew bai bording.Baroh ngi dei ban shong hapoh ki dieng ban tehlakam ia ka jingkiew jong ka bai bording elektrik.

Lada ki kompeni sam bording elektrik ka pynkiew ia ka bai bording, ka sorkar ka hap ban phah ia kane sha ki nong third bording bad ki paidbah ki hap ban siew.
“Kumta nga ngeit ba ka jing kyntiew ia ka bai bording elektrik kam dei satia ka mat bad ki paidbah ki dei ban siew ia ka bording elektrik ba ki pyndonkam” ula ong shuh shuh.