Nongpoh, 30 Naitung: Ki Lai ngut ki nongialam ka Hynniewtrep Youth Council (HYC) Ri Bhoi District, kiba kynthup ia u Bah Hercules Suting, President, u Bah Tony Shylla, ba dei u General Secretary lem bad u Bah Shan Marwein, mynta ka sngi ba ar, ki la hap ban leit mih sha Khanapara Police Station, kata hadien ba ki la shah khot hajir ha ki Pulit jong katei ka Police Station, ha kaba iadei ruh halor ka jingjia ba dang shu jia shen ha shnong 11mer Mawsmai, Ri Bhoi.
La khot hajir ia kitei ki nongialam ka HYC Ri Bhoi, ka dei halor ka jingjia ha ka por ba ki leit khynra Trading Licence ia kawei ka Karkhana sainjri, kaba la pyniaid da u bar jylla kaba don ha 11mer Mawsmai.
Ha ka por ba kitei ki nongialam ka HYC Ri Bhoi, ki la leit sha katei ka thanad, la synran da Bah Gee Mawlong, Vice-President ka HYC Sengkmie, ha ryngkat ka jingdon kiwei ki nongialam ka HYC na Ri Bhoi.
Haba iadei bad katei ka jingshah khot hajir ha ki Pulit, u Bah Hercules Suting, haba kren sha ki lad pathaikhubor, u la ong ba ma u lem bad kitei ki arngut ki la shah pyngat haduh 6 tylli ki kyndon ain, hapoh ka Khanapara Police Station.
Utei u nongialam ka HYC Ri Bhoi u la ong ruh, ba kum ki nongialam ka seng, kim don jjngsngew eiei halor katei ka jingshah khot hajir ha ki Pulit, namar ba ki dkhot ka seng kim shym la leh ia kaba bakla, hynrei ki leh ia kaba donkam bad kata ka long ban khanglad ia ki briew nabar ba kin wan leh ia ki kam sengkam sengkam, khlem da pynbiang ia ki kot ki sla.
Namarkata, kumba ka seng ka la leit ban khynra Trading Licence na katei ka Karkhana sainjri bad ba u trai u khlem pyni ia kata ka Trading Licence, ka seng kaba ieng ha ka nongrim ban dawa na ka District Council ba kan leh tyngeh ia utei u bar jylla uba pyntrei ia katei ka Karkhana sainjri, namar ka seng hi kan ym shong thait, hynrei kan iaibteng ban khynra ia kiwei pat de ki Karkhana, ba la pyniaid da ki bar jylla, ba ki dei ban pynbiang ia ki kot ki sla.
Balei ki bar jylla na ka thain Northeast India kim leit seng kam sha ki jylla kiba don ha ki rud duriaw.Balei ki bar jylla ki sngewtynnad ban sah bad seng kam tang ha Meghalaya. Ki trai jylla ki lah dei ban seng ia ki karkhana bapher bapher khnang ban ioh ia ai kam ia la ki trai jylla