Ba khynra laisen, hap shuki U bah Titos, kyntait U CEM thymmai

Shillong:U Chief Executive Member ka Khasi Hills Autono mous District Council, u bah Pyniaid Sing Syiem, u la kyntait ba ka jinghap shuki CEM u bah Titosstarwell Chyne ka dei namar ba u la pynlong ia ka jingkhynra ia ka Trading License ha kine ki sngi.

Haba kren mynta ka sngi sha ki lad pathai khubor, u bah Pyniaid u la ong ba ym lah ban pynshong nongrim ba ka jinghap shuki CEM, ka dei na ka jingkhynra ia ka Trading License bad u la ong ba kito ki briew kiba nabar ki bym dei ki Khasi, kim lah ban leh kam khaïi jongki khlem ki License.

Lah ban kdew ba ka EC kaba ialam u Bah Titsosstarwell, ka la pynlong ia ka jingkhynra ia ka Trading License bad kumjuh ia ka Labour License ia ki bar jylla ha ka kylleng ka nongbah dang shen bad ka la kurup ruh bun hajar kiba la shu trei bylla niah kali khlem License na ka Council.
“Kata te ngim lah ban pynshong nongrim ha kata, namar ba ki bar jylla ki bym dei Khasi, ngim lah ban mab ba kin pyniaid ia ki kam khaïi khaba khlem ki License”, la ong u bah Pyniaid.

U la ong ba la shna khnang ka ain Trading By Non-Tribals Regulation Act ka long ban tehlakam ia ki briew kiba nabar kiba wan seng kam seng jam ha kane ka jaka, bad ka Executive Committee thymmai kan ym ailad ba kin leh ia ki kam khaïi laitluid bad kan khang wat ia kiba dei ban khang.
“La don khnang ka ain Trading By Non-Tribals Regulation Act ban tehlakam ia kata. Ka jingthmu hi ka long ba ki nongseng jong kane ka Ain, ka long kumno ba ki briew jong ngi kiba la lah ban seng kam seng jam, kin ioh ban treikam. Kumba ka long mynta, kiba bun kiba la wan ban iakren ia ka Trading License ban ai ia ka aplikeshon ban pynthymmai, ngin sa tip hadien katto katne por namar ba ngi dang shu shimti shen”, la ong u bah Pyniaid.

Ha kajuh ka por, u la maham ia kito ki bar jylla, ba kane ka Executive Committee kan ym ailad ia kiba iaid pyrshah ia ka ain. “Kawei ka khubor kaba nga kwah ban ai sha ki bar jylla kiba khaïi, wat mut ba kin ioh lad ban khaïi laitluid ha kane ka EC, wat nym sngew shngain, ia ka kamram kaba ai bor ha ngi ban khynra, ban talasi, ngin iaid beit bad ia kito ki bym ithuh ia ka KHADC, lada ka dei ka lynti ban khang ia kita ki kam khaïi jongki, ngin hap khang. Te, lada kiba wan ban aplai da ka lynti kaba dei, kata ka shong ha ka EC ban ai ne ban pynduh. Namarkata ka daw, ngi don ha ka Council, kane ka tnad ka long kaba donkam haduh katta katta, bad ngin iatreilang ban pyndep ia ki kam”, la ong u CEM.